Gjatë 24 orëve të fundit, Kukësi u mbizotërua nga moti i ftohtë me një përmirësim të lehtë me temperatura që variuan nga -17 gradë në -7 gradë, mesditën e djeshme.
Puna vijoi në të gjitha akset për hapjen e rrugëve dhe konkretisht u hapën këto akse: Bushtrice; Kalis (fadroma po punon për hapjen e rrugëve në fshtratat e kësaj njësie); Fshat (traktori me zinxhir po punon per rrugën e Çajes dhe Buzëmadhes); Ura e Koloshit – Orgjost, Kosharisht, Pakisht (traktori me zinxhire po punon në drejtim të fshatit Orçikel, Zapod e Bele); Topojan qendër, Nange, Bushat, Bicaj-Mustafaj (do të punohet në Mholë, Kolesjan dhe Gabricë); ka përfunduar hapja e rrugëve në njësitë administrative Terthore, Shtiqen. Kolsh e Surroj; në njësinë administrative Malzi mbetet ende i bllokuar fshati Pistë.
Gjatë ditës së djeshme pati dy urgjenca mjekësore në Çinamakë të Njësisë Surroj dhe në Bushat të Njësisë Bicaj, të cilat u transportuan drejt Spitalit Rajonal të Kukësit. Gjatë ditës së nesërme do të punohet në fshatrat Cernalevë e Oreshkë të Njësisë Administrative Shishtavec, në Nimçe të Njësisë Administrative Topojan dhe do të shikohet mundësia për fshatrat Xhaferaj, Breki e Borje.
Grupet e avarive të Drejtorisë së Ujësjellësit sot kanë punuar në qytet për shkrirjen e disa tubacioneve të ngrira të rrjetit të ujësjellësit si pasojë e temperaturave të ulëta, ndërkohë që është ruajtur intervali i lëvizjes së ujit në tubacione çdo dy orë me qëllim shmangien e ngricave.
Po ashtu, bashkia Kukës kërkoi 150 pako ushqimore për Kalis dhe 70 pako për Arrnin.
