Me sa duket mes opozitës dhe qeverisë ka ndërmjetësime për dialog. Këtë gjë e ka thënë nga Shkodra, ambasadori i OSBE Bern Borchartd.
Pas një takimi me studentët e universitetit të Shkodrës “Luigj Gurakuqi” Borchartd deklaroi se po nxit opozitën dhe qeverinë për dialog.
Ai shprehu dëshirën që të gjitha palët të marrin pjesë në zgjedhje.
“Po tentojmë në çdo formë që të ketë bisedime. Duam që të gjithë faktorët politikë të marrin pjesë në zgjedhje.
Është e pamundur për mua që të shikoj të ardhmen se çfarë mund të ndodh në Shqipëri”, deklaroi ambasadori i OSBE.
Sa i përket vjedhjes së votave në zgjedhjet e kaluara të përgjithshme, Borchardt tha se të gjitha partitë kanë pasur përfaqësues në KQZ dhe i kanë njohur zgjedhjet e vitit 2017.
***
Gazetarët: Zoti Ambasador, ju sot ishit në një takim me studentët e Shkodrës. Cili ishte fokusi i diskutimeve me ta dhe a lidhej kjo me zhvillimet politike qe po përjeton Shqipëria?
Ambasadori: Ky i sotmi qe një diskutim shumë i gjerë. Shkoi që nga situata e tanishme politike te protestat e studentëve të fundit të vitit të kaluar. Dhe me thënë të drejtën studentët më bënë shumë përshtypje; më bënë pyetje shumë të informuara. Më kujtohet kur isha më përpara Ambasadori i Gjermanisë në Shqipëri, studentët më bënin pyetje që lidheshin me gatimet shqiptare. Kurse këto të sotmet ishin pyetje me natyrë politike dhe ekonomike dhe unë u përpoqa që t’i përgjigjesha sa më mirë që mundesha.
Gazetarët: Nuk po arrijnë të gjejnë dakordësinë palët dhe kriza për fat të keq po tejzgjatet duke rrezikuar edhe zgjedhjet. Çfarë mund të bëhet tashmë në gjykimin tuaj?
Ambasadori: Ne po kërkojmë dhe nxisim të gjitha forcat politike që të marrin pjesë në zgjedhje. Nxisim dialogun dhe një përpjekje të përbashkët për të zgjidhur problemet me të cilat ballafaqohet vendi.
Gazetarët: A mund të ketë zgjedhje tranzitore? A mund të ketë zgjedhje pa opozitën?
Ambasadori: Nuk e kam sferën e kristaltë që të parashikoj të ardhmen.
Gazetarët: Z. Ambasador, ju komentuat diçka rreth opozitës së re që është në Kuvend megjithëse dy partitë e mëdha opozitare që ndodhen në protesta nuk e njohin këtë opozitë. Është në gjykimin tuaj një kuvend legjitim ky që kemi sot?
Ambasadori: Të gjitha partitë politike që kishin përfaqësuesit e tyre në Komisionin Qendror të Zgjedhjeve i njohën rezultatet e zgjedhjeve të 2017-ës.
/a.rada
