Komisioni i Posaçëm për Reformën Zgjedhore po zhvillon sot mbledhjen e radhës, në formën e një tryeze teknike pune, përqendruar në disa prej çështjeve të fushatës zgjedhore.
Në fjalën e tij, Kryetari i Prezencës, ambasadori Bernd Borchardt, theksoi edhe një herë rekomandimin për një reformë të plotë dhe në kohë, e cila do të trajtojë të gjitha rekomandimet e papërmbushura të OSBE/ODIHR-it nga tri zgjedhjet e fundit. “Mandati i Komisionit të Posaçëm u zgjat së fundmi dhe unë i rekomandoj fort Komisionit ta finalizojë reformën zgjedhore brenda këtij afati të ri”, tha Borchardt. Ai u ndal te çështja e blerjes së votës, duke thënë se Prezenca e OSBE-së po i ndjek me shumë vëmendje rastet e denoncuara në prokurori dhe shpreson të ketë më shumë padi dhe vendime gjykate.
Komisioni, me mbështetjen e OSBE-së, do të organizojë tryeza të tjera teknike edhe për çështje si roli i medias në zgjedhje, keqpërdorimi i burimeve shtetërore dhe financat e partive politike.
Më poshtë fjala e plotë e ambasadorit Borchardt:
· Është kënaqësi për mua të jem me ju sot në këtë tryezë teknike pune të parë, së bashku edhe me përfaqësues të shoqërisë civile dhe kolegen time Nicola Schmidt nga ODIHR-i në Varshavë.
· Aktiviteti i sotëm është i pari i një sërë tryezash teknike pune që Komisioni i Posaçëm planifikon të organizojë për fusha specifike të zgjedhjeve. Shpresoj shumë që diskutimet në këtë tryezë të jenë sa më të thelluara, pasi ato janë baza për marrjen e vendimeve politike nga Komisioni dhe, më pas, nga Kuvendi.
· Edhe pse rrezikoj të bie në përsëritje, më lejoni të theksoj edhe një herë që ne rekomandojmë fort një reformë të plotë dhe në kohë, një reformë që trajton të gjitha rekomandimet e papërmbushura të OSBE/ODIHR-it nga zgjedhjet e viteve 2013, 2015 dhe, sigurisht, ato të vitit të kaluar.
· Mandati i Komisionit të Posaçëm u zgjat së fundmi dhe unë i rekomandoj fort Komisionit ta finalizojë reformën zgjedhore brenda këtij afati të ri. Hapat përgatitorë që Komisioni ka ndërmarrë deri tani, si përcaktimi i objektivave, hartimi i kalendarit të punës dhe dëgjesat me shoqërinë civile, kanë qenë më se të lavdërueshme. Tani është koha për rezultate konkrete. Bashkë me OSBE/ODIHR-in, ne po i ofrojmë mbështetjen tonë të plotë parlamentit shqiptar në realizimin e reformës.
· Një nga çështjet që u përmend nga bashkëkryetarët është çështja e shumëdiskutuar e blerjes së votës. ODIHR-i rekomandon që “nevojiten përpjekje serioze për të trajtuar çështjen e vazhdueshme të blerjes së votës, si nëpërmjet një fushate për ndërgjegjësimin qytetar ashtu edhe nëpërmjet ndjekjes penale, me qëllim forcimin e besimit te procesi zgjedhor”. Ne po i ndjekim me shumë vëmendje rastet e shkeljeve zgjedhore të denoncuara në Prokurorinë e Përgjithshme dhe presim me padurim që të ketë më shumë padi dhe vendime gjykate.
· E nxis fort Komisionin e Posaçëm dhe pjesëmarrësit e tjerë që të zhvillojnë diskutim të hapur, praktik dhe të orientuar drejt rezultateve, bazuar në gjetjet dhe, si edhe në përvojën e gjerë të secilit prej jush. Duhet të merren vendime të rëndësishme, pa vonesa të mëtejshme. Sikurse e thashë, ne jemi të gatshëm të vijojmë ta mbështesim Komisionin e Posaçëm./a.m.
