Situata e Neymar është krejtësisht e paqartë, imazhi i tij në pikën më të ulët, pas akuzave për përdhunim. Skuadra e tij franceze, duke parë këtë “fotografi” të yllit të vet, është gati të presë oferta për ta shitur brazilianin me çmimin e duhur. Kështu bën me dije prestigjiozja franceze “L’Equipe”, e cila siguron se kampionët e Ligue 1 do të hiqnin dorë nga njeriu 222-milionësh që këtë verë për një ofertë të konsiderueshme.
Braziliani thuhet se është subjekt i interesimit nga ish-klubi i tij, Barcelona, dhe gjiganti tjetër i La Liga-s, Real Madridi. Secila nga skuadrat në fjalë nuk ka më parasysh shifra të tilla prej 222 milionë eurosh, aq sa PSG e bleu sulmuesin në vitin 2017, por shumë më pak. Mediat europiane kanë shkruar këto ditë se dëmtimet e shpeshta dhe akuzat për përdhunim e kanë bjerrë në maksimum imazhin e Neymar, për pasojë edhe çmimin e kartonit të tij.
Tashmë flitet për shuma të tilla, 100 milionë euro, shumë herë më pak se paratë e paguara nga kampionët e Ligue 1. Ky lajm vjen pas deklaratës së presidentit të PSG, Nasser al-Khelaifi, se ai nuk do të mbështesë asnjë sjellje të pahijshme të lojtarëve të klubit të tij.
g.kosovari
