Ish-presidenti i FIFA-s, Sepp Blatter, deklaron se ka qenë dëshmitar në hedhje shorti të paracaktuar në futbollin evropian, duke përdoruar gogla të nxehta e të ftohta. Deklarata e Blatterit është bërë në një intervistë me gazetpn argjentinase La Nacion.
Blatter siguron se asnjë hedhje short nuk është fiksuar gjatë qëndrimit të tij 18-vjeçar në krye të FIFA-s, por e ka parë të ndodhë në kompeticionet evropiane.
“Unë nuk i kam prekur kurrë goglat”, thotë zvicerani. “Sigurisht që mund t’i shënosh duke i nxehur apo ftohur. Kam parë hedhje shorti në nivel evropian, ku ka ndodhur. Por kurrë në FIFA”.
I pyetur për shpjegime të mëtejshme nga intervistuesi, Blatter nuk ngurron.
“Goglat futen në frigorifer që më parë. Kur i prek mund t’i dallosh nga temperatura”.
Zvicerani 80-vjeçar mbron veten dhe FIFA-n nga akuzat për korrupsion, të cilat e kanë futur në kaos organizatën e futbollit ndërkombëtar dhe ka çuar në arrestimin e një numri zyrtarësh të lartë.
“Blatter nuk është i korruptuar. U përpoqën të gjenin diçka për mua, por nuk do të gjejnë asnjë fakt që unë kam shkelur ligjet e Zvicrës”, thotë ish-bosi i FIFA-s, i pezulluar për gjashtë vjet për shkak të një pagese dy milionë franga për Michel Platini, ish-president i UEFA-s.
“FIFA nuk është e korruptuar. Një organizatë nuk mund të jetë e korruptuar, vetëm njerëzit mund të jenë”.
DailyMail/d.i.
