Kërcënimet dhe lëvizjet e fundit të presidentit Ilir Meta janë thjeshtë furtunë në gotë uji. Të paktën kështu mendon deputeti i opozitës, Arlind Çaçani. Ky i fundit gjatë një prononcimi për gazetën “SOT” sfidoi publikisht presidentin Meta, teksa i kërkoi që të bëhet bashkëpunëtor i drejtësisë dhe të tregojë se kush janë të politikanë e korruptuar që kanë abuzuar me fondet e pasuritë publike. Në këtë kontekst, zoti Çaçani është shprehur se nëse Meta do t’i përgjigjet pozitivisht kësaj kërkese, ai do të ketë mundësinë që të hyjë në histori dhe të shpallet hero i gjallë.
Sa i takon përplasjeve të fundit mes Presidencës dhe Qeverisë, deputeti i opozitës theksoi se ato janë lojëra politike dhe se bëhen për të fituar kredo politike. Megjithatë, ligjvënësi që përfaqëson Kolonjën në Kuvendin e Shqipërisë u shpreh se opozita që ai bën pjesë nuk do të bëhet kurrë pjesë e pazareve dhe se ajo është në Parlament për t’ju çjerrë maskën politikanëve e pushtetarëve që kanë 30 vjet që tallen me qytetarët shqiptarë.
“Paralajmërimet e Z. Ilir Meta unë do i merrja seriozisht dhe e mbështesja pa as një rezervë vetëm në një rast. Meta ka shansin dhe populli do ta amnistoje. Po e do Meta Shqipërinë aq sa thotë këto ditët e fundit le të dalë dhe të rrëfehet të tregojë bashkëpunëtorët e korrupsionit të lartë shtetërore me kë ka bashkëpunuar këto 30 vjet. Ti shpjerë të gjithë përpara drejtësisë si një bashkëpunëtor i drejtësisë dhe ai do të shpallet një hero i gjallë. Vetëm kështu e besoj unë presidentin. Sa për të hyrë në Kuvend apo për ta shpërndarë këtë, i sugjeroj kreut të shtetit që ta zgjidh me ata që e vunë President të Republikës. Ne jemi aty për opozitë, një opozitë sa më objektive dhe jo të ndikuar nga pazaret dhe marrëveshjet. Ne jemi opozita me konstruktive qe ka njohur historia e pluralizmit në këto 29 vite. Sa për ta hetuar e kam thënë disa herë janë lojëra dhe presione që i bëjnë njeri-tjetrit në kohë paqe dhe kohë lufte. Megjithatë, me besim te drejtësia dhe institucionet e reja dhe me sytë nga SHBA e BE, besoj se ditë më të mira do të vine për qytetarët shqiptarët”, deklaroi deputeti i opozitës, Arlind Çaçani gjatë një prononcimi për gazetën “SOT”.
