Lulzim Basha ka zhvilluar ditën e sotme një takim me të rinj të Partisë Demokratike në qytetin e Beratit nga ku ka folur në lidhje me situatën politike në vend.
Nga aty ai u shpreh se rezultati i zgjedhjeve të 14 majit nuk ishte surprizë, teksa i cilësoi zgjedhjet si “një farsë të shoqëruar me dajre e të shara”.
Ai vijoi duke thënë se duhet një plan realist në lidhje me të ardhmen e vendit, ndërsa shtoi se “nuk duhet t’i kushtohet më rëndësi revolucionit, pasi i ka ‘dalë boja'”, duke iu referuar revolucionit të paralajmëruar muaj më parë nga ish-kryeministri Berisha.
Basha theksoi rëndësinë e referendumit dhe votës së emigrantëve, teksa tha më tej se duhet të ketë riciklim të elitave si kryeministri dhe Presidenti.
Si në cdo dalje tjetër publike, Basha vijon të bëjë thirrje për vetting të politikanëve dhe riciklim të atyre që i referohet si elita.
“Këta që marrin përsipër detyrat më të larta shtetërore duhet të kalojnë vettingun. Propozimi ka dy vite në parlament. Hetim i plotë i ligjshmërisë për pasurinë për poiltikanët. Riciklimi i elitave shenjë për emancipimin e shoqërisë. Presidenti i Republikës, jo më shumë se dy herë, Kryeministri pa limit. Kjo duhet të marrë fund. Pushteti korrupton, pushteti absolut korrupton ne mënyrë absolute.
Nëse do të kishim referendumet nuk do të kishim nevojë për t’i diskutuar fare këto ndryshime. Duhet një plan realist. Boll më me revolucion, i doli boja”, tha Basha gjatë një takimi me të rinjtë në Berat./m.j
