Kandidati i Pavarur për Bashkinë Tiranë, Gjergj Bojaxhi, reagoi sot në një dalje për mediat në lidhje me parkun midis Korpusit të Universitetit dhe Gardës së Republikës.
Sipas tij, kjo hapësirë e gjelbër është bërë gati për t’u betonizuar, ndërkohë që Bojaxhi theksoi se “kemi arritur në këtë pikë si rezultat i një serie vendimesh që kryeministrat dhe kryetarët e bashkisë kanë marrë sëbashku”.
“Në vitin 2004 me firmë të kryeministrit Nano, kjo zonë u hoq nga parku i Liqenit duke e shtyrë kufirin e parkut në brendësi. Në vitin 2006, me firmë të kryeministrit Berisha dhe kryebashkiakut Rama kësaj zonë iu shndërruar destinacioni nga park në zonë ndertimi” – tha Bojaxhi.
Ai përmendi edhe rolin e bashkisë në drejtimin e qeverisë aktuale dhe kryebashkiakut Basha. Sipas tij, në vitin 2014 kjo zonë është lënë për për ndërtim pa asnjë kufizim e lartësi.
“Shkatërrimi i Tiranës ka qënë një proçes i qëllimshëm dhe sistematik i klasës politike që na ka qeverisur këtë çerek shekulli. Shkatërrimi i hapësirave publike ka ardhur për shkak të korrupsionit të kastës sonë politike, në bashkëpunim me klientët e tyre” – tha kandidati Bojaxhi.
