Gjergj Bojaxhi thotë se zgjidhja e krizës është që këta politikanë të mos kushtëzojnë njëri-tjetrin, por të kushtëzohen në raport me qytetarët. Ai shprehet se në bazë të Kushtetutës dhe kontratës kolektive që kemi, qytetari duhet të jetë sovrani dhe politikani shërbyesi.
I ftuar në emisionin ‘Opinion” të gazetarit Blendi Fevziu, Bojaxhi cilësoi se në kushtet ku jemi po vazhdojmë të presim zgjidhje nga tavolinat ku luhen pazare politike, njësoj si në ’98 dhe 2008-ën.
“Nuk mund të fajësohen rregullat për ecurinë e ngjarjeve. Problemi qëndron brenda vetë strukturave partiake. Kur të ketë demokraci brenda institucioneve politike të cilat pretendojnë se administrojnë demokracinë në shtetin shqiptar, do të ketë edhe ndryshime në realitetin politik”.
Kandidati për Tiranën i SFIDA për Shqipërinë, u shpreh se nëse duam të rregullojmë të ardhmen duhet të ndryshojmë së pari elitën politike.
“Reforma në politikë është ajo e munguara në 25 vite. Kjo bëhet duke kaluar politikanët të parët në vetting”, u shpreh Bojaxhi i SFIDA për Shqipërinë. /b.d
