Kandidati i pavarur për Tiranën, Gjergj Bojaxhi i ka hapur “luftë” kandidatëve të dy forcave kryesore politike Halim Kosova dhe Erion Veliaj. I ftuar në studion e televizionit Neës24, Bojaxhi është shprehur se është i gatshëm për debat publik me të dy kandidatët partiakë për të diskutuar mb problemet dhe zgjidhet që ata mund të ofrojnë për Tiranën.
Në fjalën e tij Bojaxhi tha se kryeqytetit i nevojitet një drejtues që mendon për interesat dhe nevojat e qytetarëve, dhej o për interesat e forcës politike nga ai vjen. Ai tha se kandidatura e tij sjell për Tiranën një model të ri qeverisje në nivel lokal, ku në fokus janë nevojat e qytetarëve, dhe zgjidhja e problematikave me të cilat ata përballen çdo ditë.
“Ka një segment të madh të shoqërisë në Tiranë që jemi një shumicë dhe partitë politike nuk e ofrojnë këtë. Kjo klasë politikë nuk përfaqëson qytetarët. Po bëj diçka që shumë prej nesh e mendojnë dhe e bisedojnë dhe do të donin që të ndodhte. Ne nuk kemi më drejtues të pushtetit lokal e qendror që nuk mendojnë për qytetarët,por për interesat e partive. Ne nuk mund të flasim për një program pasi nuk lejon Kodi Zgjedhor për të bërë fushatë. Shqetësimi kryesor vjen nga politika që ne kemi dhe për raportet sesi drejtuesit e kaluar e kanë përdorur Tiranën, qoftë për të fituar vetë politikisht, qoftë për ta përdorur si trampolinë për më tej. Tiranës i duhet një individ që të punojë për qytetarët dhe jo për interesat e tij politike. Sot situata në kryeqytet është e rënduar, pasi ka shumë problematika për qytetarët. Nëse nuk zgjidhim problemet për qytetarët, situata do të vijojë e tillë. Mendoj se të gjitha këto probleme janë të zgjidhshme. Por gjithçka varet nga kostot”, tha Bojaxhi.
Duke u shprehur se klasa politike në vend nuk di si t’i dëgjojë qytetarët, Bojaxhi tha se deri më tani Bashkia e Tiranës është përdorur për luftë politike.
“Duhet të shprehemi drejtpërdrejt për disa nga çështjet më shqetësuese, dhe nuk duhet t’i lëmë në dorë forcave politike, sepse për shkak të kësaj ne sot kemi një kryeqytet që është shumë larg standardeve evropiane. Klasa politike në vend ka problemin se nuk di t’i dëgjojë qytetarët. Rama e ka përdorur bashkinë e Tiranës për të bërë luftë politike. Ne nuk duam ta përdorim Bashkinë e Tiranës si llogore kundër qeverisë. Bashkia e Tiranës është përdorur për luftë politike”, tha ai
Redaksia Online
(JavaNews.al)
