Gjergj Bojaxhi thotë se situata politike në vend është thjesht luftë e ngushtë e partive të mëdha për mënyren se si do të poziconohen, duke anashkaluar problemet e qytetarëve.
“Sot Shqipëria është në pikun që ne qajmë hallet se si ata do bëjnë koalicione, me kë do të bashkëpunojnë dhe se si do të ndajnë pushtetin. Nëse supozojmë se koalicioni u shpërbë dhe krijohet një koalicion i ri, çfarë do të ndryshojë për shqiptarët?! A do jetë një jetë më e mirë për ne? Në thelb, nuk mendoj se për qytetarët do të ketë ndonjë ndryshim nga mënyra sesi këto parti bëjnë pazare, pasi do të jenë po të njëjtët njerëz”, është shprehur Bojaxhi.
I ftuar në emisioni Tonight, të gazetares Ilva Tare, Bojaxhi tha gjithashtu se realiteti politik është i sunduar nga partitë e mëdha të cilat nuk ofrojnë asnjë mundësi për ndryshim.
“Për sa kohë që janë të njëjtët njerëz, e njëjta frymë, i njëjti model i brendshëm brenda këtyre partive, edhe rezultati do të jetë i njëjtë”, tha ai.
Anëtari themelues i SFIDA për Shqipërinë ka shprehur gjithashtu mbështetje ndaj reformës në drejtësi por, sipas tij, konteksti ku ajo është vendosur është i gabuar dhe i qëllimshëm.
“Reforma në drejtësi është shitur jo thjesht se do të pastrojë sistemin gjyqësor, por sikur eventualisht do të pastrojë sistemin politik. Kjo është një gënjeshtër e madhe. Korrupsioni në Shqipëri nuk fillon nga administrata, gjyqësori apo prokuroria. Korrupsioni këtu fillon nga politika” ka deklaurar Bojaxhi, në studion e “Tonight” në Ora Neës. /b.d
