Bojaxhi: Amerikanë, jeni tetë vjet të vonuar me dënimin e Berishës!

DASH sipas aktivistit Gjergj Bojaxhi e ka dhënë vendimin non grata me vonesë për ish kryeministrin Sali Berisha.

Siç u shpreh ai në emisionin “Arnautistan” në MCN TV qytetarët shqiptarë e votuan Berishën jashtë qeverisë në 2013-ën për shkak të perceptimit të korrupsionit.

Ai shtoi se ajo çfarë nuk i pëlqen në këtë histori është fakti që amerikanët kanë hyrë kaq thellë në çështjet politike dhe drejtësisë në Shqipëri.

“Në 2013-ën votuesit shqiptarë e dhanë verdiktin e tyre se kush ishte Berisha. Në 8-vjeçarin kur ai ishte kryeministër Shqipëria pati zhvillim ekonomik, u bënë punë dhe investime publike dhe qytetarët e votuan jashtë pushtetit jo se nuk kishte bërë punë, por për shkak të perceptimit të korrupsionit, kështu që heqja nga pushteti e Berishës ishte një akt që qytetarët shqiptarë e bënë për këtë arsye.

U përqëndrova tek korrupsioni më shumë, por qytetarët janë bazuar edhe tek elementët autokratikë, kështu që në një këndvështrim amerikanët janë tetë vite me vonesë.

Do kishin qenë miqtë më të mirë po ta kishin bërë këtë 8 vite më parë. Ajo që s’më ka pëlqyer është që kjo nuk është standarde e politikës së jashtme. Fakti që amerikanët kanë hyrë kaq thellë në çështjet politike dhe drejtësisë në Shqipëri nuk është në aspektin normal të DASH dhe duhet të jenë më të kujdesshëm dhe të kalibruar.

Nuk është se ata hoqën një peron autoritar dhe zgjodhën një engjëll, por në kemi rënë nga shiu në breshër. Mendoj se në kushtet kur kemi nivel edhe më të lartë korrupsioni do ishte me vlerë që sistemi i drejtësisë të godiste. Të godasësh dikë që po e bën këtë sot është drejtësi funksionale”, tha Bojaxhi.

g.kosovari