Ditën e sotme ILDKP kallëzoi në Prokurori ish-deputetin socialist Arben Ndoka i vënë nën akuzë për fshehjen e rreth 1.5 milionë eurove pasuri. Në njoftim, thuhej se pavarësisht se Ndoka është thirru nga ILDKP, ai nuk është paraqitur për të dhënë shpjegime për shumën e gjetur nga kontrolli.
Sipas ILDKP, ky është rasti i dytë kur një deputet nuk pranon të japë shpjegime për shumat marramëndëse që i janë gjetur nga kontrolli i pasurive. Por kush është deputeti tjetër? Burime për JavaNews.al bëjnë të ditur se deputeti tjetër që nuk ka pranuar të shkojë në zyrat e ILDKP për të dhënë sqarime lidhur me rreth 500 mijë euro, është ish-Ministri i Financave Ridvan Bode. Sipas ILDKP-së këto para ishin deklaruar në prona dhe depozita në emër të vetë Bodes dhe të familjarëve të tij, por nuk shpjegohej se si janë përftuar.
Kallëzimi ndaj Bodes u bë në Prill të këtij viti, ndërsa ILDKP theksonte se edhe pse është njoftuar disa herë nga ky institucion, ish-Ministri ka refuzuar që të paraqitet për të dhënë shpjegime, lidhur me burimin e krijimit të pasurive të tij, familjarëve dhe të personave të lidhur me të, si dhe të paraqiste dokumentacionin përkatës.
Në prononcimet për mediat, Bode do të pretendonte se bëhej fjalë për sulm politik dhe se ai nuk është njoftuar nga ILDKP.
