Incidentet që kanë shoqëruar përpjekjet për mësimin e gjuhës amtare nga fëmijët e emigrantëve shqiptarë në ishullin e Kretës, kanë mbërritur deri në parlamentin grek.
Duke marrë shkas nga publikimi i një fotografie, ku një prej fëmijve kishte veshur një bluzë me stemën tashmë të famshme të “Autocthonus”, deputeti i Demokracisë së re të opozitës, Theodoros Karaoglu, ka kërkuar interpelancë me ministrin e Jashtëm Nikos Kotzias. Duke argumentuar kërkesën e vet, deputeti opozitar, komenton faktin e pranisë në fotografi të zëvendësambasadorit shqiptar Florian Nova.
“Mundet që një fëmijë i mitur që mos e ketë idenë se çfarë shpreh bluza që ka veshur. Mirëpo është e papranueshme që zëvendësambasadori i Shqipërisë në Greqi të paraqitet duke përqafuar të miturin e duke dërguar mesazhe irredentizmi kundër vendit që priti qindra mijëra bashkatdhetarë të tij”, nënvizon deputeti i demokracisë së Re.
Në përgjigjen e nënshkruar nga shefi i diplomacisë greke, vihet në dukje qysh në fillim se ministria e Jashtme nuk gjykon se nevojiten deklarata publike për këtë çështje.
Kotzias theksoi se ky ishte një rast unik, pa precedentë dhe se në asnjë mënyrë nuk duhet të fokusohen tek një fëmijë që nuk e di se çfarë kuptimi ka harta.
“Për një vend demokratik si Greqia nuk gjykohet mënyrë e përshtatshme reagimi demaskimi publik i një të mituri, apo riprodhimi i lajmeve për kultivimin e një klime negative tensioni”.
Ministria e Jashtme dënon sa manifestimet ksenofobe dhe raciste, aq edhe ato të nacionalizmit ekstrem dhe pikëpamjeve irredentiste”, vazhdon letra e ministrit të jashtëm, ku theksohet se rasti i shënuar në Kretë “ishte një incident i veçuar”.
Sa i përket pranisë së diplomatit shqiptar në atë veprimtari, ministria e jashtme e Greqisë mban parasysh faktin se nuk është shënuar deri më sot një rast tjetër i ngjashëm nga ana e diplomatëve shqiptarë të akredituar në vendin tonë”.
“Shënojmë gjithashtu se ministri shqiptar i Diasporës, Pandeli Majko, gjatë takimit në Athinë me ministrin e brendshëm grek, dha shpjegime për incidentin në Kretë, duke sqaruar se ishte një rast i veçuar që nuk duhet të hedhë hije mbi marrëdhëniet shumë të mira Greqi-Shqipëri”.
I bëmë të qartë palës shqiptare edhe nëpërmjet ambasadës në Athinë se synojmë të mos bëhemi sërish dëshmitarë incidentesh të ngjashme në të ardhmen”, përfundon letra e nënshkruar nga ministri i jashtëm grek.
