Leo Messi bëhet “i gjallë”. Që ishte “arratisur” pa destinacion të qartë, me pushime, bashkë me familjen e tij, kjo dihej. Mediat botërore kishin shkruar për këtë gjë, duke nënvizuar nevojën që do të ketë ylli argjentinas për të mbledhur veten dhe riparë me qetësi vendimin e paralajmëruar të tij, për tërheqje nga kombëtarja, meqë dështoi në një tjetër finale, atë të “Copa America”, 2016. Ai ndodhet në Bahamas, ku po shijon pushimet me bashkëshorten, Antonella, dhe dy djemtë.
Faqja e njohur ndërkombëtare e lajmeve pikante sportive, “101greatgoals.com”, ka publikuar sot një fotografi të yllit argjentinas, me diçiturën “Leo Messi in the Bahamas!” Por, përtej zbulimit të destinacionit të pushimeve të këtyre ditëve të pesë herë fituesit të “Topit të Artë”, në bluzën që ka veshur Messi shohim edhe një shfryrje të dufit, me një stampim në anglisht: “F..k penalties”.
Kujtojmë se në finalen e “Copa America”, viti 2016, Argjentina u mund nga Kili falë goditjes së 11-metërshave, ndërsa koha e rregullt dhe shtesa prej 30 minutash u mbyll pa gola, në baraspeshë të plotë.
Ishte Leo Messi, ai që mori guximin të ekzekutonte penalltinë e parë për të tijtë, por gaboi, duke “shtruar rrugën” e dështimit së këndejmi të të tijve ndaj Kilit. Disfata e përloti yllin e Barcelonës, madje bëri të dilnin nga goja e tij fjalë lamtumire nga kombëtarja. Megjithatë, dje dhe sot është shkruar se Lionel Messi ka ndryshuar mendje në lidhje me daljen në pension ndërkombëtar.
“La Nacion” ka shkruar se Messi tani ka në plan të ribashkohet me “Albiceleste” në nëntor, për kualifikueset e Kupës së Botës, duke nënvizuar se ai do të humbasë vetëm ndeshjet e shtatorit. “Pleshti” është golashënuesi më I mirë për kombëtaren argjentinase, në të gjitha kohërat, teksa vendosi standarde të reja në këtë drejtim, kundër SHBA-ve, me golin e tij të 55-të në karrierën me Argjentinën.
Telesport/d.i.
