Kreu i LIBRA-s Ben Blushi ka sulmuar nga aula e parlamentit koalicionin qeverisës dhe ka shigjetuar dy përfaqësuesit kryesorë të tij, kryeparlamentarin Meta dhe kryeministrin Rama. Blushi e ka cilësuar koalicionin si një makinë llogaritëse të cilës të dhënat i futen gabim.
Blushi tha se pasi Rama shkatërroi PS-në, tani i është vënë LSI-së. Ndërsa Metës, kreu i LIBRA-s i “këshilloi” që të flasë me gojën e tij dhe jo me të Petrit Vasilit, Vangjel Tavos apo ndonjë tjetër eksponenti të LSI-së.
“A ka stabilitet një vend kur kreu i kuvendit dhe kryetari i shtetit thërrasin këshillin e sigurisë kombëtare, kur kryeministri mbron Balilin…?
A punon dot prokuroria kur në SHBA i heqin vizën të paktën 20 prokurorëve?
A ka qeveri kur ministri i drejtësisë thotë se qeveria merr llokmën, kurse gjyqtarët marrin thërrimet?
Kjo është për fat të keq kjo është republika jonë në kaos…
Sot koalicioni i rilindjes po organizon funeralin e vendit tonë. Edi Rama është i paaftë, kurse i dyti bën gjithçka pëër të na bindur sesa i paaftë është ai. Po i them diçka Ilir Metës, nuk ka nevojë të na tregosh se çfarë bën Rama, puna është se çfarë bën ti.
Mbasi shkatërroi PS-në, i është vërsulur Ilir Metës dhe do të shkatërrojë LSI-në… kam disa vite që ja njoh aftësinë shkatërruese të Ramës, kjo është e vetmja që ka… por mua nuk më vjen keq që Rama po shkatërron LSI-në.
A ishte Ilir Meta që me gojën e Petrit Vasilit tha se policia i fut drogë deputetëve? Dhe pastaj mban në këmbë qeverinë…!
Ore pyetja është, o Ilir Kur do të flasësh me gojën tënde?
Dukesh si llogaritar, kur thua vetëm 71…dhe normalisht aq di, sepse vetëm numra di ti! Sepse partia e LSI-së nuk mendon por vetëm llogarit. Ky është dhe koalicioni i rilindjes, vetëm numra! Kanabis, kaos! Jemi kthyer në republikën e kaosit!”-tha Blushi.
