Ben Blushi deklaroi dje se “Samiti i Diasporës dështoi t’u sigurojë shqiptarëve në emigracion të drejtën e votës”. Në një postim në faqen e tij në Faceboo”, Blushi u shpreh: “Arsyeja që u dha nga qeveria është vetëm alibi e shëmtuar. Tre vjet mjaftonin për regjistrimin e tyre dhe votimin elektronik. Diaspora duhet të ketë jo vetëm të drejtën e votës, por edhe të përfaqësimit në Kuvend, në kushtet kur 40 për qind prej nesh jetojnë në emigracion. LIBRA do luftojë që kjo e drejtë të kthehet në normë!” Ndërkohë, në një analizë të tij, publikuar në faqen zyrtare të LIBRA-s, Blushi u shpreh se Shqipëria nuk bëhet pa diasporën.
“Po flitet shumë këto ditë për diasporën. Po çfarë është diaspora? Në rastin e Shqipërisë është një diell që na ngroh më pak se ?’e lejojmë. Nëse nuk do të ishte diaspora dhe kontributi ekonomik i emigrantëve, Shqipëria do ishte një vend shumë më i varfër. Emigrantët kanë qenë, janë dhe do të jenë një nga dy motorët e zhvillimit ekonomik dhe demokratik të Shqipërisë”, u shpreh Blushi. “Duke ikur, ata i kanë dhënë vendit po aq shumë sa ata që kanë qëndruar, dhe këtë e them pa hezitim. Ne që jetojmë këtu përfitojmë nga kontributi i tyre. Dikush më ka thënë se, nëse ata shqiptarë që kanë ikur janë të marrë, ne që i kemi detyruar të ikin jemi të çmendur. Duhet të jetë e vërtetë”, tha Blushi. Sipas tij, “shqiptarët nuk ikin nga thatësira, as nga uria, as nga lufta. Ata ikin si viktima të qeverive të tyre. Vitin e kaluar ikën 100 mijë”. “Unë besoj se ka ardhur koha për një administratë diasporike. Djem dhe vajza të rritur apo të shkolluar jashtë, mund të jenë pjesë e administratës sonë. Nëse do të ishte për mua, një pjesë e gjykatësve dhe prokurorëve të rinj që do të ndryshohen për shkak të reformës në drejtësi, duhej të ishin detyrimisht nga diaspora. Ata kanë të drejtë të vënë drejtësi në një vend që i zboi për shkak të padrejtësisë”, tha Blushi.
bw/d i
