Për herë të parë, deputeti socialist Ben Blushi i ka dhënë të drejtë Sali Berishës për diçka… në deklaratën e tij se ai ka ikur nga pushteti, por që qeveris akoma. Kjo për deputetin socialist është e vërtetë, pasi metoda e qeverisjes së ish kryeministrit është ende prezente në qeverisjen e të majtëve sipas Blushit.
“Edhe sot u bë një garë, se kush i ka më shumë kriminelët.. kush ka shitur më pak drogë, kush ka vrarë më pak… Kjo do të thotë që gara e dëmve ka për të vazhduar! Cfarë u tha prapë sot, sepse ishte një pikë që u fol për energjinë elektrike… kush ja ka shitur më shtrenjt energjinë elektrike qytetarëve? PD apo Rilindja?! Kjo pra është arsyeja që më vjen keq për të gjithë ju por më shumë keq më vjen për të vërtetën.
Iku Saliu në vitin 2013, kam 20 vjet që unë nuk e besoj, por një fjalë ama të tij e besoj… kur ai thotë se unë ika por unë akoma vazhdoj të qeveris… dhe në fakt ka të drejtë, ai ka ikur por metoda e tij e qeverisjes jo!”- tha deputeti socialist.
Blushi ka folur në lidhje me ligjin e ri të pronave të qeverisë së majtë, duke e cilësuar si një draft që nuk sjell zgjidhjen e pronës në vend.
“Ne i themi pronarëve se atyre nuk do tu shtyhen afatet e aplikimit, ndërsa të tjerëve ja shtyjmë. I themi të gjithë investitorëve që mund të vijnë në Shqipëri, se këtu pronat do të mbeten të pazgjidhura! E kur do të mbarojë ligji 7501 ?! Kur do t’i jepet fund këtij ligji? Ligji që keni sjellë, ku do t’i çoni tokat që dalin tepër? Kush do t’i ndajë, kryebashkiaktë? Me ato që kanë dalë… Si mund të besoj unë se ata kanë drejtësi, sens e standart për të ndarë ato copa tokash që do të mbeten?”- tha Blushi. / Java/ a.k
