Deputeti socialist Ben Blushi, duke folur në Kuvend, e nisi fjalën me protestën mbi bunkerin pranë Ministrisë së Brendshme. Ai ironizoi si protestën, ashtu edhe bunkerin.
“Po të isha anëtar i PD nuk do të shkoja në protestën e sotme, sepse ajo sot ishtë një çrregullim në trafik. Nuk po e krahasoj me atë para një jave që mu duk si takim i Minatorëve të Pavarur kur vajtët i ratë bunkerit. Gjëja më e mirë ishte që hoqët ato teneqetë dhe ne pamë çfarë kishte mbrapa. Me thënë të drejtën mua nuk më pëlqen bunkeri, se ta quash vepër arti është njësoj sikur të quash një shtyllë, skulpturë” – tha Ben Blushi.
Ai bëri një rezyme të shkurtër të historisë së protestave të PD duke thënë se është një parti e dhunshme.
‘Jeni e vetmja parti që dhunoni edhe kur jeni në pushtet, edhe në opozitë’ – tha Blushi duke iu referuar datave 14 shtator 1998 dhe 21 janar 2011.
Nga ana tjetër, Blushi u ndal në reformimin e drejtësisë: “Keni kërkuar zgjedhje të parakohshme çdo ditë. Perceptimi për reformën në drejtësi, si i joni ashtu edhe i ndërkombëtarëve, është se ju nuk e doni këtë reformë” – tha ai.
