Pasi bëri publike propozimet për 8 parimet që duhen ndjekur për ndryshimet statutore dhe reformimin e Partisë Socialiste, deputeti Ben Blushi dha një deklaratë për mediat. Ai tha se ndryshimet statutore po bëhen vetëm në interes të kreut aktual Edi Rama, dhe në mungesë të plotë të transparencës.
“Unë jam anëtar i kryesisë dhe nuk dimë kush janë propozimet për statuin e ri. Por pavarësisht unë e kam thënë që do kisha disa propozime dhe më lind e drejta. Kjo ëhstë arsyeja që kam bërë disa propozime, të cilat parashikojnë në radhë të parë një parti më moderne dhe më centraliste, që e kishim, e kemi dhe me sa duket do ta kemi edhe pas Kongresit. Ndryshimet statutore do duhej të kishin kaluar në kryesi, të ishin diskutuar. Po bëhet një statut për një njeri, po bëhet në interes të një njeriu që është Edi Rama. Ata që po punojnë për statutin po qepin një kostum për Edi Ramën”, tha Blushi.
Blushi tha më tej se propozimet e bëra nga ana e tij synojnë hapjen dhe demokratizimin e partisë. Sa i takon mënyrës së zgjedhjes së kryetarit Blushi, tha se ëhstë për parimin që është aktualisht, zgjedhje me parimin një anëtar një votë. Ky parim sipas tij është shkelur pasi zgjedhjet nuk janë zhvilluar prej 3 vitesh.
“Unë zgjodha rrugën të propozoj parime që të hapet partia, propozoj parimin e primarit, të zgjedhjeve paraprake, që PS të zgjedhë në mënyrë transparente ata që kandidojnë, shikoni në SHBA si i zgjedhin kandidatët për president. Për kryetarin e partisë të mbetet parimi që është sot, sipas të cilit mandati është 4 vjecar dhe zgjidhet me parimin një anëtar një votë. Në kushtet e shkeljes së një mandati prej 3 vitesh i jemi drejtuar Komisionit për Garancitë Statutore, presim një shqyrtim për ta komentuar. Shpresoj të ketë një interpretim para Kongresit, se nëse merret pas Kongresit nuk ka vlerë”, tha Blushi.
Më tej ai deklaroi se PS mbetet parti e majtë, por prej 3 vitesh ka qeverisur si parti e djathtë. Në disa raste, “Rilindja ka qenë më e djathtë se e djathta, nëse kemi parasysh konçesionet”, tha Blushi.
