Kreu i Forumit Rinor të Partisë Demokratike (FRPD), Besart Xhaferri, i ftuar në studion e “Off the Record” me Andrea Dangllin, në A2 CNN, deklaroi se përfshirja në listën e PD-së të Tedi Blushit dhe Erisa Xhixhos nga Partia e Lirisë është një “kalkulim politik”.
“Partia e Lirisë ka 4 vende në listën e mbyllur. Kjo parti, në vitin 2021 ka marrë 107 000 vota. Aludojnë se kjo parti nuk i ka më kaq vota, por nuk besoj se mendon njeri në Shqipëri që kjo parti ka më pak se 40 000 vota. 4 mandate në listë të mbyllur përkojnë me 40 000 vota. Unë mendoj se kanë shumë më shumë se kaq, sepse do të tentojnë të nxjerrin deputetë edhe nga listat e hapura. Janë një parti që i justifikon ato 4 vende me votat që do i sjellë koalicionit. E njëjta gjë vlen edhe për Partinë Republikane, që ka vetëm një deputet në listë të mbyllur, por sjell më shumë se 10 000 vota. E njëjta gjë me Partinë Agrare, PBDNJ dhe PDIU. Për 8 vendet e aleatëve në listën e mbyllur, mendoj se janë mbi 100 000 vota që i vijnë koalicionit tonë”, shpjegoi Xhaferri.
“Demokratët e dinë që e vetmja gjë që ka rëndësi është të rrëzojmë Edi Ramën dhe janë të galvanizuar dhe të mobilizuar për këtë. Kemi miratimin e demokratëve për të bërë këtë listë sepse jemi të detyruar ta bëjmë këtë listë, jo se e kemi zgjedhur ne. Kjo listë është produkt i atij kodi elektoral të vitit 2021 që hoqi koalicionin parazgjedhor”, shtoi Xhaferri.
Kur u pyet nëse është i sigurt që kjo listë është pa gabime, kreu i FRPD-së tha: “E konsideroj listë fituese sepse me këtë listë maksimalizojmë votën opozitare me këtë listë. Do doja të kishim edhe parti të tjera, për të dhënë edhe më shumë vende. Për shembull, zotin Shehaj, zotin Lapaj… Të gjitha do i doja në koalicionin opozitar, duke humbur edhe më shumë vende në listën e mbyllur. Vetëm e vetëm për të garantuar fitoren ndaj Edi Ramës”.
