Donald Trump ka kërcënuar se do të vendosë tarifa prej 25% ndaj Bashkimit Evropian , duke pretenduar se blloku prej 27 vendesh është “formuar për të kërcënuar Shtetet e Bashkuara”.
Duke folur në takimin e tij të parë të kabinetit të mërkurën, presidenti i SHBA tha se së shpejti do të publikojë detajet e kërcënimit të fundit tarifor. “Kemi marrë një vendim dhe do ta shpallim shumë shpejt. Do të jetë 25%,” tha ai.
BE-ja u zotua të hakmerret menjëherë nëse SHBA vendos tarifa ndaj eksporteve të vendeve anëtare.
“BE do të reagojë me vendosmëri dhe menjëherë kundër barrierave të pajustifikuara ndaj tregtisë së lirë dhe të ndershme, duke përfshirë kur tarifat përdoren për të sfiduar politikat ligjore dhe jodiskriminuese. BE-ja do të mbrojë gjithmonë bizneset, punëtorët dhe konsumatorët evropianë nga tarifat e pajustifikuara”, tha një zënëdhënës i Komisionit Europian.
Blloku është partneri i tretë më i madh tregtar i SHBA-së së bashku me Kinën. Trump ka thënë se do të vendosë tarifa 25% ndaj dy partnerëve më të mëdhenj tregtarë të SHBA-së, Kanadasë dhe Meksikës, javën e ardhshme.
Presidenti amerikan nuk dha detaje të mëtejshme, por përmendi prodhuesit e makinave dhe tha se taksat do të aplikoheshin “në përgjithësi”. “Dhe kjo do të jetë në makina dhe të gjitha gjërat e tjera,” tha ai.
Kreu i Shtëpisë së Bardhë ka bërë një sërë njoftimesh për vendosjen e tarifave ndaj partnerëve më të mëdhenj tregtarë të SHBA-së, por ka vonuar vazhdimisht vendosjen e taksave ndaj Kanadasë dhe Meksikës.
Në fillim të kësaj jave, Trump mbrojti kërcënimet e tij tarifore dhe tha se makinat e huaja, droga dhe çipat gjysmëpërçues do të goditeshin brenda javësh.
Sipas Bloomberg, tarifat e Trump mund të arrijnë deri në 29.3 miliardë dollarë (28 miliardë euro) të eksporteve të bllokut.
