Vettingu, procesi themelor i reformës në drejtësi, përballet të mërkurën në gjykatë me rezistencën e gjyqtarëve, të cilët kanë kërkuar shfuqizimin e tij. Gjykata Kushtetuese do të vendosë nëse do të rrëzojë apo jo disa nene të ligjit të vettingut, pas padisë së bërë nga Shoqata Kombëtare e Gjyqtarëve të Republikës së Shqipërisë dhe Unioni i Gjyqtarëve të Shqipërisë.
Seanca zhvillohet në orën 10, ku juristët e Kuvendit të Shqipërisë do të përballen me shoqatat e gjyqtarëve, të cilët kërkojnë shfuqizimin e 25 neneve të ligjit të rivlerësimit të gjyqtarëve e prokurorëve.
Shoqatat kërkojnë shpalljen si antikushtetuese të pikave në ligj që lejojnë mbledhjen e informacioneve nga dëshmitarë të mbrojtur të prokurorisë, nga përgjimet telefonike apo nga dëshmi konfidenciale që mund të mbërrijnë në institucionet e vetingut nga oficerë apo agjentë të policisë gjyqësore.
Gjyqtarët ankimues kërkojnë gjithashtu që gjyqtarët dhe prokurorët e përfshirë në procesin e vettingut të kenë të drejtën të japin dorëheqjen në çdo kohë, duke sjellë si rrjedhojë ndërprerjen e kontrollit, e drejtë kjo që tashmë ka skaduaar.
Kuvendi i Shqipërisë ka bërë gati mbrojtjen, në të cilën argumenton se procesi i kontrollit të pastërtisë së figurës është bazuar tek standardet ndërkombëtare, duke u bazuar edhe në rekomandimet e Venecias.
ma.me
