Kolonat e gjata në kufirin mes Malit të Zi dhe Kroacisë vazhdojnë të shkaktojnë vështirësi për mijëra udhëtarë, mes tyre edhe shumë shqiptarë që po udhëtojnë drejt vendeve të Evropës Perëndimore pas pushimeve verore.
Në pikën kufitare Karasoviçi–Debeli Brijeg janë krijuar kolona që kalojnë 20 kilometra, ndërsa sipas mediave kroate pritjet zgjasin deri në 10 orë, me raportime jozyrtare që flasin edhe për raste kur udhëtarët kanë pritur deri në 28 orë.
Situata është bërë aq e rëndë, sa banorët e zonës së Konavles kanë hapur dyert e shtëpive të tyre për t’u mundësuar udhëtarëve përdorimin e tualeteve dhe pushimin, ndërsa autoritetet lokale kanë vendosur edhe cisterna me ujë të pijshëm për personat që qëndrojnë prej orësh të bllokuar në trafik, shkruajnë mediat.
Për situatën ka reaguar edhe Ministria për Evropën dhe Punët e Jashtme e Shqipërisë, e cila pranon se pritjet e gjata në kufirin Kroaci–Mali i Zi janë bërë një fenomen që përsëritet pothuajse çdo verë për shkak të fluksit të jashtëzakonshëm të udhëtarëve.
Në njoftimin e saj, ministria thekson se rritja e ndjeshme e lëvizjeve në rajon dhe numri gjithnjë e më i madh i personave që udhëtojnë drejt Shqipërisë me rrugë tokësore gjatë sezonit turistik sjell, veçanërisht në ditët me fluks maksimal, pritje të gjata në pikat kufitare mes Kroacisë dhe Malit të Zi.
“Ky është një fenomen që, për shkak të volumit shumë të lartë të lëvizjeve, përsëritet pothuajse çdo verë, veçanërisht gjatë fundjavave dhe ditëve me fluksin më të madh”, thuhet në reagimin e ministrisë.
Më tej, Ministria bën të ditur se përfaqësitë diplomatike shqiptare janë në komunikim të vazhdueshëm me autoritetet e vendeve përkatëse, me synimin që procedurat kufitare të zhvillohen sa më shpejt dhe të shtohen kapacitetet për të minimizuar kohën e pritjes së qytetarëve.
“Ministria për Evropën dhe Punët e Jashtme dhe përfaqësitë tona diplomatike janë në komunikim të vazhdueshëm me autoritetet dhe institucionet përgjegjëse, me synimin që, në përputhje me legjislacionin dhe procedurat në fuqi në secilin shtet, kalimi i qytetarëve të jetë sa më i shpejtë dhe sa më i lehtë”, thuhet në deklaratë.
Sipas ministrisë, vetëm gjatë sezonit veror rreth 300 mijë shtetas shqiptarë kalojnë përmes këtij korridori rrugor, çka krijon ngarkesë të madhe për infrastrukturën dhe shërbimet kufitare.
Megjithatë, autoritetet shqiptare theksojnë se do të vazhdojnë bashkëpunimin me institucionet e rajonit për të gjetur zgjidhje praktike që do të lehtësojnë lëvizjen e qytetarëve, deri në zgjerimin e plotë të hapësirës Schengen në këtë pjesë të Ballkanit.
Ndërkohë, autoritetet kroate u kanë bërë thirrje udhëtarëve që, nëse është e mundur, të përdorin itinerare alternative përmes Bosnjë dhe Hercegovinës ose të zgjedhin transportin detar nga Durrësi drejt porteve italiane, në mënyrë që të shmangin kolonat e gjata në kufirin Kroaci-Mali i Zi.
