Kuvendi është thirrur me dekret të Presidentit në detyrë, Bujar Nishani për t’u mbledhur më datën 24 korrik për ceremoninë e betimit të Presidentit të ri, Ilir Meta.
Por eksponentë të Partisë Socialiste dhe disa juristë janë shprehur në media se ekzistojnë mundësitë e pengesave ligjore, që nëpërmjet bojkotimit të seancës të pengohet betimi i Metës si President dhe rrjedhimist të mundësohet shkarkimi i tij.
Në një reagim për mediat, burime nga stafi i Ilir Metës bëjnë të ditur se “deputetët e Kuvendit kanë detyrim kushtetues pjesëmarrjen në seancë, pasi duhet të respektojnë dekretin e Presidentit. Por edhe sikur një pjesë e tyre të mungojnë, kjo nuk e bën ceremoninë të pavlefshme. Pasi mjafton që në sallë të ketë edhe një prani minimale deputetësh. Nga pikëpamja ligjore, të gjitha pretendimet e hedhura në media nuk qëndrojnë, për sa kohë që proceduara parlamentare nuk paraqet asnjë pengesë për ceremoninë dhe pjesëmarrjen e ligjvënëseve”.
Gjithashtu bëhet e ditur se “Z.Meta i mjafton bashkëpunimi me kreun e shtetit Bujar Nishani për ceremoninë e betimit. Presidenti i ri betohet dhe merr detyrën më 24 korrik”.
Të njëjtat burime pranë stafit të Presidentit të zgjedhur kanë bërë edhe një thirrje ndaj të “shqetësuarve” për këtë çështje. “Të mos mërziten dhe nëse dikush ka probleme me temperaturat e larta në këto ditë korriku, i këshillojnë që të shkojnë në bregdet ose në mal pasi z Meta i mjafton vetëm bashkëpunimi me z.Bujar Nishani për të përmbyllur siç duhet procedurat. Betimi i kreut të shtetit është një proces formal që nuk ka asnjë lidhje me vijimin e mandatit. E thënë ndryshe, nëse në seancë nuk vijnë deputetët, janë këta të fundit që shkelin Kushtetutën, sepse marrja e detyrës së Presidentit vijon normalisht”, – përfundojnë burime nga stafi i Metës.
