Një sasi e konsiderueshme (3 ton) sallam i markës “Wudy”, është bllokuar nga Autoriteti Kombëtar i Ushqimit në një magazinë në rrugën “Butrinti” në Laknas të Tiranës.
Inspektimi në magazinën frigoriferik “Ismet Darsi” është bërë më 17 maj të këtij viti ku është zbuluar se ky subjekt nuk kishte të drejtën për të tregtuar sallamin “Wudy” në Shqipëri.
Çështja është duke u ndjekur edhe nga Drejtoria tatimore, Dogana, dhe seksioni i Krimit Ekonomik, për shkak se ka dyshime që sasia e madhe e sallamit të jetë futur kontrabandë në vendin tonë.
Inspektorët e AKU-së nuk i kanë gjetur dokumentet shoqëruese të blerjes së sallamit Wudy, dhe as dokumente të origjinës së tij, apo fletë analizat, siç është procedura ligjore për t’i treguar këto produkte. Përgjegjësi i Sektorit të Marrëdhënieve me Publikun dhe Ndërgjegjësimit të Konsumatorit në Autoritetin Kombëtar të Ushqimit, Granit Sokolaj, tha për Express se dyshohet që sallami të jetë kontrabanduar në territorin shqiptar, pasi nuk kishte as dokumentacionin shoqërues, nuk përmbante asnjë etiketim sipas standardeve të tregtimit në Shqipëri.
AKU ka vendosur bllokimin e 3 tonëve të sallamit në këtë magazinë frigoriferike, ku edhe pse produkti është brenda standardeve të tregtimit, pra nuk është i skaduar, kushtet në këtë magazinë nuk ofronin ruajtjen e këtij produkti ushqimor. Po ashtu, ndaj Ismet Darsit është vendosur një gjobë prej 1 milionë lekësh të vjetra. /Gazeta Express/
