Gjatë një konference për shtyp, ministrja e Brendshme, Albana Koçiu, iu përgjigj interesimit të gazetarëve edhe sa i përket çështjes së monopatinave, të cilat janë bllokuar për qarkullim. Ministrja tha se vendimi për të ndaluar lëvizjen e tyre derisa të bëhhet rregullimi me ligj është i duhur.
“Nëse do më pyesnit sërish do ju them me bindje që është vendimi i duhur për të ndaluar qarkullimin e monopatinave deri në momentin kur lëvizshmëria e tyre do të rregullohet me ligjet e duhura”, tha ajo.
“Unë e kam thënë, po punojmë për të. Nuk është çështje kaq e thjeshtë sepse është një gjë të vendosësh shpejtësinë atje, pajisjet me të cilat duhet të lëvizë çdo përdorues, por kërkon një studim të thelluar lidhur me rrugët, sheshet apo infrastrukturën për të lejuar lëvizshmëri të sigurt të monopatinave dhe kërkon gjithashtu një kulturë shumë të mirë të përdorimit të tyre. Ka plot prindër që na falenderojnë për faktin që i kemi hequr monopatinat dhe nuk po i lejojmë të përdoren pa kriter. E kuptoj edhe shqetësimin që krijon për mosvajtjen e shpejtë në punë, por siguria dhe jeta është më e rëndësishme se kapja e orarit të punës”, tha Koçiu.
