Bllokada e Ngushticës së Hormuzit po riformëson ndjeshëm rrugët ndërkombëtare të tregtisë, ndërsa trafiku i anijeve me kontejnerë po devijohet drejt transportit tokësor për të arritur destinacionet e tyre.
Mbyllja e ngushticës ka detyruar kompanitë e transportit detar të kërkojnë korridore alternative tokësore për furnizimin me ushqime dhe mallra të ndryshme, pasi anijet nuk mund të aksesojnë më portet e vendeve të Gjirit përmes detit, sipas burimeve të sektorit të logjistikës dhe transportit detar.
Sipas AFP, porti saudit i Xhedahut në Detin e Kuq po shndërrohet në një qendër të re rajonale të tranzitit, ku mbërrijnë anije të kompanive të mëdha si MSC, CMA CGM, Maersk dhe Cosco përmes Kanalit të Suezit.
Nga aty, ngarkesat transportohen me kamionë përgjatë autostradave shkretinore drejt destinacioneve si Sharjah, Bahreini dhe Kuvajti, të cilat nuk janë furnizuar më përmes detit gjatë dy muajve të fundit.
“Porti i Xhedahut nuk është i dimensionuar për të përballuar vëllime të tilla importi dhe tashmë po shfaqet një situatë mbingarkese”, deklaroi Arthur Barillas de The, bashkëthemelues i kompanisë së transportit Ovrsea.
Ndërkohë, operatorët detarë kanë bërë të ditur se do të përdorin edhe porte të tjera jashtë Ngushticës së Hormuzit, përfshirë Soharin në Oman dhe portet e Khor Fakkan dhe Fujairah në Emiratet e Bashkuara Arabe. Po ashtu, porti i Akabës në Jordani po shërben si pikë kyçe për furnizimin e Bagdadit dhe Basrës në Irak, ndërsa një korridor tokësor përmes Turqisë po mundëson hyrjen e mallrave në Irakun verior, thuhet në raport.
