Një orë e 20 minuta ka zgjatur takimi i kryeministrit grek, Kyriakos Mitsotakis, me sekretarin amerikan të shtetit, Anthony Blinken , i cili më herët ka pasur një takim me presidentin turk Erdogan.
Mitsotakis e ka pritur Blinkenin në rezidencën e tij në Kretë, ku dhe i ka treguar gjirin e Soudës dhe bazën amerikane, ndërsa sipas informacioneve të mediave greke, kryeministri e ka qerasur me raki dhe i ka dhuruar çorape.
“Marrëdhëniet dypalëshe Greqi-SHBA janë në pikën më të mirë që kanë qenë ndonjëherë”, tha Kyriakos Mitsotakis në një deklaratë të shkurtër para kamerave, gjatë takimit të tij me Sekretarin e Shtetit amerikan.
Mitsotakis i uroi mirëseardhjen Anthony Blinken në shtëpinë e tij në Chania , duke theksuar “është një kënaqësi e vërtetë t’ju mirëpres në shtëpinë time, në gjirin Souda, dhe me të vërtetë nuk mund të mendoj për një vend që simbolizon më mirë thellësinë e partneritetit tonë nga këtu, ishulli i Kretës.
Në këto kohë të vështira dhe sfiduese për rajonin, është jashtëzakonisht e rëndësishme që ne të qëndrojmë krah për krah, jo vetëm për të punuar për të forcuar më tej marrëdhëniet tona, por edhe për të vepruar si aleatë dhe për të siguruar paqe dhe stabilitet. Përsëri, kam kënaqësi të vërtetë t’ju mirëpres këtu”, tha Mitsotakis.
Sekretari Amerikan i Shtetit, nga ana e tij, theksoi: “Jam plotësisht dakord me atë që thatë për marrëdhëniet dypalëshe”, duke theksuar se në 30 vjet që kam bërë këtë punë ai nuk kujton asnjë periudhë tjetër kur miqësia, marrëdhëniet mes SHBA dhe Greqia të jenë më të forta.
“Dhe sigurisht që kjo është për shkak të afërsisë mes dy popujve, por edhe vetë lidershipit tuaj mbi të gjitha dhe ne ju jemi mirënjohës për këtë.
Ne përballemi me disa nga sfidat më të vështira me të cilat jemi përballur ndonjëherë, por fakti që jemi të bashkuar, pavarësisht nëse është Ukraina, siguria dhe stabiliteti në Lindjen e Mesme, ose lufta në Gaza, na jep fuqi të jashtëzakonshme dhe perspektivë. për të ardhmen”, shtoi ai.
Në mbyllje, Blinken theksoi se ka shumë çështje që do të diskutojnë, por “bashkëpunimi juaj dhe aleanca juaj do të thotë shumë për Shtetet e Bashkuara”.
Pas takimit privat mes Mitsotakis dhe Blinken, pasoi një takim pune, ku morën pjesë ministri i Jashtëm grek, Giorgos Gerapetritis , zv.ministrja e Punëve të Jashtme, Alexandra Papadopoulou , ambasadori i SHBA-së në Athinë, George Tsounis dhe zv. Stafi i Departamentit të Shtetit, Tom Sullivan.
Vizita e Blinken në Greqi u zhvillua si pjesë e turneut të tij në vendet e Lindjes së Mesme dhe Mesdheut Lindor, mes frikës për një zgjatje të luftës në Gaza.
Në total, turneu përfshin Izraelin dhe Bregun Perëndimor, Turqinë, Greqinë, Jordaninë, Katarin, Emiratet e Bashkuara Arabe, Arabinë Saudite dhe Egjiptin./m.j
