Duke folur për vizitën e Sekretarit Amerikan të Shtetit, Antony Blinken në Tiranë gjatë ditës së sotme, avokati Spartak Ngjela, tha se më i godituri nga kjo vizitë ka dalë Sali Berisha, i cili ka paditur Blinkenin për shpalljen non-grata nga SHBA-të në 2022-in.
Gjithashtu, Ngjela shtoi se takimi i Blinken me kryetarin e SPAK, Altin Dumani ishte një mesazh i qartë mbështetje për reformën në drejtësi dhe luftën ndaj korrupsionit.
“Takimi me kryetarin e SPAK na jep të kuptojmë se ata do vazhdojnë reformën në drejtësi dhe luftën ndaj korrupsionit. Duhet të shohim nëse ka sjellë emra të rinj non-grata”, nënvizoi Ngjela ndër të tjera.
Sipas Ngjelës, një vizitë e tillë tregon se shqiptarët janë faktor shumë i rëndësishëm në rajonin e Ballkanit, ndërkohë që kanë përballë Serbinë që ndikohet nga Rusia.
“Ata pa botën shqiptare kanë defekt shumë të madh politik për të ardhmen. E kemi faktin, na ka dhënë një shtet të dytë, Kosovën. E ka njohur si shtet dhe po e përkrah. Interesi i SHBA është se ne jemi këtu në një botë sllave por nuk jemi sllavë dhe është zonë e konkurrencës së lartë mes Uashingtonit dhe Moskës. Ata që kanë parë ëndrra me Moskën të zgjodhën nesër në mëngjes”, tha avokati.
/a.r
