Ju ka ndodhur t’ju telefonojnë për t’ju thënë se keni përfituar me ulje çmimi një dyshek, filtra uji, apo produkte të tjera. Këto telefonata të padëshiruara marketingu janë kthyer në shqetësim për qytetarët. Pa marrë asnjë autorizim paraprak bizneset telefonojnë qytetarët për të shitur shërbime dhe produkte të ndryshme.
Legjislacioni i shtetit shqiptar e parashikon qartë mbrojtjen e qytetarëve që telefonohen në raste të tilla pa pëlqimin e tyre.
“Mesazhet promocionale kur vullneti i qytetarëve nuk jepet paraprakisht ose komunikimet tregtare të pakërkuara janë një shkelje e legjislacionit për mbrojtjen e të dhenave personale si një e drejtë themelore e njeriut, e sanksionuar ne nenin 35 të Kushtetutës”.
Vitet e fundit, është rritur ndjeshëm numri i ankesave të qytetarëve pranë institucionit të Komisionerit për të Drejtën e Informimit dhe Mbrojtjen e të Dhënave Personale. Shifër rekord është shënuar vitin e kaluar.
“Në vitet e fundit vetëm me objekt marrjen e komunikimeve tregtare të pakerkuara kanë qenërreth 80 ankesa. Vetëm vitin e kaluar janë regjistruar rreth 450 ankesa. Ka një ndërgjegjësim të qytetarëve për t’i denoncuar këto raste shkelje të privatësisë së tyre”.
Po ku i sigurojnë këto biznese kontaktet e qytetarëve, pa autorizimin e tyre?
“Burimet nga merren të dhenat që kontaktojnë mund të jenë të shumëllojshme dhe një nga pretendimet që nxjerrin subjektet tregtare është që mund të bejnë kombinim rastësor të numrave pa i marrë nga asnjë tjetër burim. Edhe në këtë rast kjo konsiderohet shkelje”.
Sipas Komisionerit për të Drejtën e Informimit dhe Mbrojtjes së të dhënave personale, ankesat e qytetarëve janë adresuar, megjithatë çështja nuk ka marrë zgjidhjen e duhur.
“Në pjesën më të madhe të rasteve procedura ka avancuar nëpërmjet hetimeve adminisrtrative. Duke qenë se nga qytetarët vjen vetëm një nr telefoni kjo kërkon përpjekje shtesë nga komisioneri për të identifikuar në terren këto subjekte”.
Nisur nga kjo situatë, Komisioneri për të drejtën e Informimit dhe Mbrojtjen e të dhënave Personale ka hartuar një projektligj që tashmë është hedhur për konsultim publik. Nisma e re ligjore parashikon krijimin e një regjistri, si një mbrojtje shtesë per të dhënat personale të qytetarëve shqiptarë.
“Regjistri është i përberë nga tre komponentë dhe identifikon nr mënyrë vullnetare të gjithë ata qytetarë me elementë identifikues të tyre, emër, mbiemër, adresë email, zgjedhin falas që të regjistrohen te ky regjistër. Dhe subjekteve tregtare u lind detyrimi kundrejt një tarife që të konsultohen paraprakisht me këtë regjister dhe t’i përjashtojnë ata nga aktivitetet promocionale”.
Ndryshimi i legjislacionit synon gjithashtu qe subjektet tregtare mund të ushtrojnë aktivitetin e tyre promocional, duke garantuar njëkohësisht respektimin e të drejtës së privatësisë së qytetarëve.
