Regjisori dhe autori Pëllumb Kulla tha në emisionin “Arnautistan” të gazetarit Mustafa Nano se blerja e diplomave është një prej krimeve më të mëdha që është bërë në Shqipëri.
“Është një nga krimet më të mëdha që është bërë në këtë vend. Sepse ata që kanë blerë këto diploma, bëhen shefa, bëhen drejtorë, ministra, Presidentë ndoshta, është shumë e rëndë, një krim i padënuar”, tha ai.
Po ashtu Kulla vuri në dukje se Shqipëria është shumë mbrapa në mbrojtjen e pronësisë intelektuale:
“Aty jemi mbrapa shumë. Aty jemi kaq mbrapa sa unë mendoj se autorët këtu, prona intelektuale s’ruhet, s’janë mekanizmat për ta çuar deri në fund mbrojtjen”.
I pyetur nga moderatori Mustafa Nano mbi alibinë e atyre që pretendojnë se kushdo që të ishte në pushtet në Shqipëri do kishte abuzime dhe arbitraritete, Kulla shprehet:
“Alibia vjen nga opinionistë të ndryshëm, prapa thënieve të tyre ka interesa, dhe ata ruajnë këtë anësi. Mendoj që një shoqëri më e emancipuar, më e drejtë, më e hapur, mund ta bënte më mirë të kundërtën e famshme”.
