Konkurrenca në tregti dhe konfliktet e mëparshme janë dy pistat ku po heton policia për vrasjen e biznesmenit 52-vjeçar, Çajup Selimi mbrëmjen e të martës në Tepelenë.
Burime pranë grupit hetimor thanë se u është marrë dëshmia familjarëve të biznesmenit, ndërsa u shoqërua gjatë orëve të darkës një person me të cilin 52-vjeçari ka pasur përplasje.
Nga ana tjetër u sekuestruan kamerat e sigurisë së bizneseve rreth zonës me qëllim identifikimin e autorit, i cili u largua me shpejtësi nga vendngjarja.
Çajup Selimi ishte duke ngjitur shkallët e pallatit ku banonte kur u qëllua me dy plumba, një në kokë dhe një në trup. Ai mbeti i plagosur rëndë dhe ndërroi jetë në spitalin e Gjirokastrës pak orë më vonë.
52-vjeçari ishte baba i dy vajzave, ndërsa kishte disa biznese në qytetin e Tepelenës.
Në vitin 2018 ai u dhunua me sende të forta nga dy persona në qendër të qytetit. Në dëshminë e dhënë aso kohe, Selimi pretendonte se sulmet fizike ndaj tij ishin të përsëritura, ndërsa policia nuk kishte reaguar në asnjë rast.
/a.r
