Osman Pana, biznesmen nga Sukthi, u rrah dje në mëngjes barabarisht nga dy persona, teksa po hapte derën e magazinës. Si pasojë e goditjeve të marra, 33-vjeçari ka përfunduar në spitalin e Durrësit, jashtë rrezikut për jetën.
Policia ka bërë të ditur se ai është rrahur nga shokë të fqinjit të tij, të dy banues në Sukth, 42-vjeçari A.M. dhe 40-vjeçari B.B., të cilët janë shpallur në kërkim.
Sipas bluve, dyshohet që ngjarja të ketë marrë shkas nga një konflikt mes biznesmenit dhe shtetasit Xh.N. Kjo për faktin se Paja ka hapur një dritare në krah të banesës së fqinjit të tij. Autorët e dyshuar kanë lidhje shoqërore me shtetasin Xh.N.
Ndërkohë, vetë biznesmeni ka deklaruar se është goditur me shkop nga 5-6 persona, për të cilët nuk ishte në dijeni nëse ishin të maskuar dhe të armatosur. I kontaktuar në spital, 33-vjeçari Paja pohoi në një intervistë për Gazetën Shqiptare se nuk ka konflikte me askënd, përveçse me fqinjin e tij për dritaret e shtëpisë.
Zoti Osman, mund të na thoni se çfarë ndodhi mëngjesin e sotëm (djeshëm)?
Sapo kisha mbërritur te magazina ime dhe po e hapja, kur pesë ose gjashtë persona më sulmuan nga mbrapa. Ngjarja ndodhi rreth orës 07:00 të mëngjesit. Personat që më sulmuan, më goditën në kokë dhe në trup. Gjithçka ndodhi papritur. Nuk e di se cilët ishin agresorët. Ata ishin shumë, ndërsa unë isha i vetëm. Nuk mbaj mend shumë, pasi më lanë pa ndjenja.
Personat që të sulmuan kishin armë dhe a ishin të maskuar?
Nuk e di kishin armë apo jo, nuk mund të them gjë për këtë. Këtë duhet ta zbardhë policia, pasi janë filmimet ku duken autorët.
Me çfarë të goditën agresorët?
Më goditën me shkop. E përsëris, ngjarja është e filmuar, sepse të dy komshinjtë e mi te magazina kanë kamera sigurie.
Ju ka vendosur njeri gjobë para ngjarjes?
Jo. Nuk më ka vënë njeri gjobë. As nuk më kanë kërkuar para.
A keni konflikte me ndonjë person?
Unë nuk kam konflikte me askënd, përveçse me një komshi timin për shkak të dritareve. Jam duke ndërtuar katin e dytë të shtëpisë sime dhe komshiu nuk do që dritaret e mia të bien nga ana e banesës së tij. Dyshoj që sulmi ndaj meje mund të jetë për këtë shkak.
Me çfarë biznesi merreni ju?
Merrem me materiale ndërtimi. Kam magazinën time afër qendrës së Sukthit. U bënë pesë vite që e kam këtë biznes.
Po më herët me çfarë aktiviteti jeni marrë?
Kam qenë emigrant në Greqi dhe u ktheva para 5 vitesh ku rinisa jetën në vendin tim. Jemi 8 fëmijë dhe unë jam i parafundit nga vëllezërit. Nuk kemi konflikte me njeri përveçse se me fqinjin.
Cili është apeli juaj?
Policia të zbardhë sa më shpejt ngjarjen dhe të vejë në pranga personat që më bënë për spital. Unë dhe pjesëtarët e familjes sime nuk i kemi bërë keq askujt. Thjesht kërkoj drejtësi.
KLODIANA HAXHIAJ/GSH
