Policia ende nuk ka arrestuar asnjë të dyshuar për rrahjen barbare të biznesmenit libanez me pasaportë amerikane, Faad Mitri.
Investitori i fuqishëm u dhunua në rrugë nga persona që i dhanë mesazhin “ik nga Shqipëria”.
Burime policore thanë për mediat se konflikti mes 54-vjeçarit dhe autorëve ende të paidentifikuar ka qenë për motive të dobëta.
Sipas të njëjtave burime, mësohet se libanezi para aksidentit ishte duke realizuar disa fotografi, gjë që mendohet se ka irrituar autorët.
“Nga hetimet e para si dhe nga dëshmia që vetë i dëmtuari ka dhënë para oficerëve të policisë ka rezultuar se biznesmeni ka qenë duke bërë fotografi në objekte të ndryshme gjatë rrugës.
Këtë gjë e ka provuar edhe aparati fotografik i 54-vjeçarit, ku në disa foto shfaqej edhe automjeti tip “Volksëagen”, ku ndodheshin autorët”, thanë të njëjtat burime, shkruan Gazeta Shqiptare.
Sipas policisë Mitri ka sqaruar se u ka bërë foto pasi drejtuesi i mjetit i kishte bërë disa herë manovrime gjatë rrugës së Rinasit.
Dhe mesa duket personat që ndodheshin në këtë automjet nuk e kanë kapërdirë këtë gjë.
Kjo “alibi” e paraqitur nga policia rrëzohet nga fakti që personat që e kanë rrahur i kanë thënë biznesmenit “ik nga Shqipëria”.
Dyshohet se ai është dhunuar pikërisht për shkak të investimit gjigand që po realizon në Gjirin e Lalzit.
Dy ditë më parë, persona të panjohur janë përplasur qëllimisht me makinën tip “Mitsubishi”, me të cilën ishte duke udhëtuar biznesmeni. (b.an)
