Investitori amerikanolibanez Fadi Mitri ka qenë i shoqëruar nga bashkëshortja dhe fëmija në momentin kur u sulmua barbarisht me shkop bejsbolli. Burime të rezervuara nga grupi hetimor thanë për gazetën “Panorama” se ai është goditur 10 herë në kokë dhe 7 herë të tjera në gjymtyrë e për pasojë ka hemtoma të shumta, ndërsa njërën këmbë e ka të thyer.
Kanë qenë 3 persona që e kanë sulmuar, pasi i kanë përplasurmakinën me të cilën ai udhëtonte në rrugën e Rinasit, paraditen e djeshme. Ndërsa sipas dëshmisë që ai dhe shoferi i dhunuar kanë dhënë para hetuesve, njëri nga autorët ka filmuar të gjithë skenën. Sipas burimeve, ky veprim i kryer nga ana e autorëve tregon se ata mund të kenë qenë të porositur për sulmin nga persona të tjerë dhe filmimi u është nevojitur si provë për të treguar se porosia është kryer.
Vetë biznesmeni i plagosur ka arritur të fiksojë targën e automjetit “Tuareg”, ku ndodheshin autorët, të cilën edhe e ka fotografuar, pasi mjeti gjatë gjithë rrugës kryente manovra të rrezikshme dhe
parakalonte makinën e tij. Burimet thanë se makina ka qenë me targa italiane, të vjetra, që pas verifikimeve nuk kanë rezultuar të ketë kaluar në rrugë zyrtare kufirin shqiptare. Targat mund të jenë të vjedhura dhe janë përdorur enkas për të kryer sulmin ndaj sipërmarrësit 55 vjeçar Fadi Mitri.
Të gjitha këto të dhëna dëshmojnë për një sulm të paramenduar dhe të qëllimshëm nga ana e autorëve dhe aspak për një ngjarje aksidentale, ashtu siç u tha dy ditë më parë në njoftimin paraprak të Policisë.
NGJARJA
Biznesmeni me shtetësi amerikane dhe kombësi libaneze u masakrua të shtunën në mëngjes me shkop bejsbolli në kryqëzimin e rrugës së Laknasit me atë të Rinasit. 55-vjeçari Fadi Mitri është administrator i kompanisë nga Katari, “Omnix Albania”, e cila do të ndërtojë një resort gjigant me vlerë 180 milionë euro në plazhin e Gjirit të Lalzit. Nga dëshmitë e dhëna në polici mësohet se biznesmeni po udhëtonte në drejtim të kryeqytetit me automjetin tip “Mitsubishi”, që drejtohej nga shoferi i tij shqiptar, me iniciale E.M., kur është përplasur nga një automjet tjetër. Në raportin e policisë shkruhet se uniformat blu janë njoftuar nga dëshmitarë të rastit se në këtë vend kishte ndodhur një aksident. Një tjetër telefonatë ka vënë alarmin pasi ka sqaruar se nuk bëhej fjalë vetëm për një aksident, por për një sherr masiv. Makina që kalonin rrugës për në Rinas ose anasjelltas njoftonin vazhdimisht policinë se kishin parë njerëz të gjakosur dhe makina të aksidentuara. Të gjitha telefonatat ishin të rezervuara për të identifikuar autorët ndërsa është përshkruar me hollësi mjeti i tyre. Një ditë më pas policia njoftoi ndalimin e 9 personave për ngjarjen, por ende nuk ka të arrestuar.
Panorama/d.i.
