Ndërsa kanë mbetur edhe 12 ditë kohë për formimin e qeverisë së re nga Lëvizja Vetëvendosje, partia që doli e para në zgjedhjet e 9 shkurtit, kryeministri në detyrë i Kosovës, Albin Kurti, deklaroi se ende nuk ka nisur negociatat me ndonjë nga partitë politike.
Ai theksoi se po bëjnë një plan për nisjen e një procesi të tillë gjatë ditëve në vijim.
“Po e bëjmë një plan edhe për këtë. I kemi më shumë se 10 ditë,” u shpreh kryeqeveritari.
Ndërkohë partia e Fatmir Limajt, Nisma Socialdemokrate, bëri me dije se do t’i përgjigjej pozitivisht çdo ftese të Lëvizjes Vetëvendosje për të diskutuar për formim të qeverisë së re.
Deputetja Xhevahire Izmaku tha për “KosovaPress” se partia e saj ka një përgjegjshmëri politike dhe nuk ka asnjë arsye për të mos u ulur në tryezën e diskutimit me partinë e Kurtit. Ajo theksoi se nëse formimi i qeverisë së re varet vetëm nga tri votat e Nisma Socialdemokrate, atëherë në raport me krijimin e institucioneve të reja nga partia e saj nuk do të ketë kushte.
Megjithatë, znj. Izmaku nënvizoi nevojën që të sqarohet pozicioni i kryetarit të Kuvendit, Dimal Basha, pasi sipas saj, legjislativi nuk duhet të funksionojë me një figurë e cila ka krijuar përçarje.
Kryetari i Vetëvendosjes, Kurti, u mandatua për kryeministër nga presidentja Vjosa Osmani më 11 tetor. Kryeministri tha të hënën se gjatë kësaj jave do të nisë bisedimet për formimin e qeverisë së re.
