Komisioneri për Zgjerim pranë Komisionit Europian, Johanes Hahn ishte sot në Tiranë, ku takoi kryeministrin Rama, bashkë me ministrat e qeverisë shqiptare.
Ai kërkoi nga qeveria shqiptare, që të rritë ritmin e zbatimit të reformave, ndërsa shpjegoi edhe procesin që do të aplikohet deri në qershorin e ardhshëm, kur të hapen zyrtarisht negociatat.
Qeveria shqiptare ka bërë publike strukturën e cila do të merret me planifikimin dhe koordinimin e procesit “screening”, i cili u hap me vizitën e Komisionerit për Zgjerimin të BE-së Johanes Hahn në Tiranë.
Vetë kryeministri Rama në fjalën e tij, theksoi nevojën për forcimin e kapaciteteve institucionale për koordinimin, raportimin, dhe zbatimin e masave që lidhen me procesin e negociimit, duke e cilësuar atë si provën më të forte të modernizimit të shtetit dhe transformimit të administratës publike shqiptare në një administratë evropiane.
Procesi i negociatave për anëtarësim të vazhdojë dhe të ngrihet mbi procesin e zbatimit të Marrëveshjes së Stabilizim Asociimit.
• Kreu i delegacionit shtetëror për dialogun politik me Komisionin dhe vendet anëtare të Bashkimit Evropian do të jetë Ministri për Evropën dhe Punët e Jashtme Ditmir Bushati.
• Koordinimin teknik të procesit të screening dhe punës përgatitore për hapjen e negociatave, qeveria shqiptare cakton Zv.Ministrin për Evropën dhe Punët e Jashtme Genti Cakaj.
• Njësia ekzistuese e koordinimit të procesit të integrimit evropian në Ministrinë për Evropën dhe Punët e Jashtme do të forcohet për t’u shndërruar në Sekretariatin e ardhshëm i cili do të sigurojë në kohë dhe cilësi ndërveprimin institucional dhe monitorimin e procesit.
• Fuqizimi i strukturave koordinuese dhe përgjegjëse në Ministritë e Linjës, dhe veçanërisht në Ministrinë e Drejtësisë dhe Ministrinë e Brendshme, të cilat mbajnë dhe barrën më të madhe të procesit të screening për kapitujt 23-24, kapituj këto, të cilët përkojnë dhe me fushat prioritare të reformave tona të brendshme në drejtim të forcimit të shtetit të së drejtës.
Eurokomisioneri për Zgjerimin nguli këmbë disa herë se Shqipërisë do t’i duhet një rrjet i tërë ekspertësh të vendosur në të gjitha dikasteret e linjës.
“Po hyjmë në një fazë të re që do të jetë mjaft kërkuese. Do të jetë thelbësore që të caktohen burime të mjaftueshme në personel dhe buxhetore nga ana juaj. Në çdo ministri të linjës do t’ju duhet një personel i mjaftueshëm e me përvojë që do të negociojë me ne sepse nuk është diçka që mund t’ja lini vetëm Ministrisë së Jashtme apo Kryeministrisë. Është e nevojshme që të keni njerëz me njohuri në të gjitha ministritë pasi do të negocioni jo vetëm me ne drejtorët e përgjithshëm, por me drejtoritë e specializuara të Komisionit”, u shpreh Johannes Hahn.
a.ç
