Nga Eduard Zaloshnja
Në prill drejtova një vrojtim statistikor në terren mbi vetidentifikimin dhe bindjet ideologjike të banorëve të rritur të Shqipërisë. Studimi u financua nga fondacioni gjerman Konrad-Adenauer-Stiftung (KAS)* dhe u bazua në një kampion të rastësishëm dhe të shtresëzuar gjeografikisht prej 1119 të rriturish në 12 qarqet e vendit, duke siguruar përfaqësim demografik, gjeografik dhe politik me një marzh gabimi statistikor nën 2.9%.
Ndër pyetjet e shumta në pyetësor, ishte edhe një pyetje mbi biografinë politike familjare para vitit 1990, si edhe një pyetje mbi votimin në zgjedhjet parlamentare të majit 2025. Duke kryqëzuar përgjigjet për këto dy pyetje, llogarita se sa të anketuar të çdo kategorie biografike votuan ose nuk votuan vjet, apo për kë votuan ata që morën pjesë në zgjedhje. Dhe meqë kampioni i vrojtimit përfaqësonte statistikisht gjithë popullsinë e rritur të vendit, rezultatet japin një pasqyrë të përafërt të elektoratit në Shqipëri.
Nga ekstrapolimi i përafërt statistikor, rezultoi se rreth 520 mijë banorë të rritur të vendit, nga 1.9 milion gjithsej (pra mbi 27% e totalit), janë nga familje që gjatë periudhës së komunizmit, ishin të përndjekura politikisht, ose ishin fillimisht komuniste e më pas të përndjekura, ose të përziera (shihni tabelën e mëposhtme). Nga këta, 18% votuan vjet për PS, 47% për PD-ASHM, 9% për parti të tjera, dhe 26% nuk votuan fare.
Rreth 387 mijë banorë të rritur të vendit, nga 1.9 milion gjithsej (pra mbi 20% e totalit), janë nga familje komuniste. Nga këta, 72% votuan vjet për PS, 10% për PD-ASHM, 7% për parti të tjera, dhe 10% nuk votuan fare.
Rreth 982 mijë banorë të rritur të vendit, nga 1.9 milion gjithsej (pra pothuaj 52% e totalit), janë nga familje që nuk i përkasin asnjërës prej kategorive të mësipërme. Nga këta, 39% votuan vjet për PS, 22% për PD-ASHM, 12% për parti të tjera, dhe 26% nuk votuan fare.
*Studimin mund ta lexoni të plotë në faqen e KAS: https://www.kas.de/en/web/albanien/single-title/-/content/statistische-studie-zur-ideologischen-identitaet-in-albanien
