Bill Gates ka dalë kundër Apple dhe pro FBI-së, në betejën mes këtyre të dyjave për mundësinë e zhbllokimit të I Phone-it të njërit prej autorëve të masakrës së San Bernardinos në Kaliforni, ku u vranë 14 persona. Themeluesi i Microsoft tha se kompanitë e teknologjisë do duhet të bashkëpunojnë me shtetin kur vjen puna tek hetimet për terrorizmin.
Në një intervistë dhënë Financial Times, Bill Gates bëri publik pozicionin e tij pro nismës së FBI-së për të marrë të dhënat e personit që kreu masakrën e dhjetorit të shkuar, me argumentin se bëhet fjalë vetëm për një rast specifik, ku qeveria kërkon aksesin në informacion.
Kjo pasi tashmë në SHBA është hapur debati i madh nëse do duhet një qasje më liberale, që tenton në ruajtjen e privatësisë, apo në një qasje më të ngushtë, si ajo për të pasur më shumë siguri dhe survejim.
“Bëhet fjalë vetëm për një rast specifik. Nuk kemi të bëjmë me një kërkesë të përgjithshme nga ana e FBI-së”- ka thënë Bill Gates, duke shtuar se të kërkuarit e informacionit për një llogari bankare, nuk do të thotë se automatikisht, ti ke aksesin tek të gjithë llogaritë e bankës.
Në fund, Gates thekson se normalisht do duhet të vendosen një sërë rregullash mbi këtë çështje.
