“Kemi arritje, aq sa në një çerek shekulli nuk u arrit të bëhej për Policinë. Por kemi ende shumë për të bërë sepse në 25 vite, Policisë iu shkatërrua imazhi. Dhe kjo është fitorja më e madhe e jona sot, fitorja ndaj mentalitetit”.
Kështu u shpreh sot gjatë një konference për shtyp, Ministri i Brendshëm Saimir Tahiri i cili e ka vlerësuar pozitivisht vitin 2016 duke bërë një bilanc të punës së Policisë dhe situatës së sigurisë në vend.
“Shqipëria në vitin 2016 ishte më e sigurtë, me më pak ngjarje kriminale, policia ishte në shërbim të qytetarit, besimi tek policia u rrit”, u shpreh Tahiri.
Por sic thotë ministri, fitorja më e madhe kanë qenë jo shifrat sesa lufta me mentalitetin e vjetër.
“Fitorja më e madhe e jona nuk është krahasimi i shifrave, por me mentalitetin. Fitorja jonë më e madhe është tek mentaliteti, së pari tek punonjësit e policisë dhe më pas tek qytetari. Sot përballë policisë nuk ka më të pandëshkueshëm e të pabarabartë kundrejt çdokujt që shkel ligjin.”
Ministri theksoi se për vitin 2016 janë konfiskuar 47.6 milionë euro pasuri dhe asete kriminale.
“Kjo është shifra se kemi ndjekur peshqit e mëdhenj. Gjatë 3 viteve janë konfiskuar 100 milionë asete e pasuri kriminale ku nga këto vetëm në vitin 2016, janë konfiskuar 47.6 milionë euro pasuri e vënë përmes krimit”.
Në këtë kuadër, Ministri i Brendshëm theksoi se policia “po rrit në mënyrë progresive kapacitetin për të shkuar drejt peshqve të mëdhenj”.
Bilanci për vitin 2016
-Me Interpol e Europol janë 15 mijë informacione të shkëmbyera
-90 persona janë arrestuar me qëllim ekstradimin nga vende të tjera drejt Shqipërisë
-Janë kapur 2111 persona të shpallur në kërkim
-38 mijë vepra penale më pak se në vitin 2015
-Mbi 3000 raste të dhunës në familje gjatë 2016
-Armëmbajtja pa leje, 1194 të arrestuar në vitin 2016
-40 mije denoncime në Komisariatin Dixhital
– 71 vrasje gjatë vitit 2016, numri më i ulët në 25 vjet
-75% e vrasjeve, për motive familjare, pronësie apo konflikte të çastit
-Vjedhjet me armë janë 60% më pak se në vitin 2015
Me pas ministri iu pergjigj interesit te gazetareve
A mendoni se i keni fituar betejat me krimin?
Unë nuk quaj asnjë betejë të fituar, sepse unë mendoj që përballë paligjshmërisë e kriminalitetit të akumuluar në 25 e kusur vite, unë mendoj se nuk e kemi mundësinë të fitojmë këto beteja brenda 1 viti, apo 4 viteve. Por kemi fituar një luftë, atë kundër mentalitetit të së kaluarës. Policia sot nuk është e vjetruar, por e rinovuar me fytyrë të re, me besimin e qytetarit që kthehet tek Policia. Besim që kishte humbur për çerek shekulli. Na jepni kohë.
Ka gjëra që nuk i kemi bërë mirë, sigurisht, por jemi 24 në 24 orë në shërbim të qytetarit.
