Që kur ka hyrë në fuqi ligji e deri më tani janë trajtuar 108 projekte investimi, prej te cilave: 48 kanë përfituar status strategjik. Industria e turizmit është sektori i preferuar ku është përqendruar edhe numri më i madh i këtyre projekteve.
Gati gjysmës së propozimeve ju është dhënë “drita jeshile”, 14 janë refuzuar për shkaqe të ndryshme dhe po aq janë aktualisht në proces shqyrtimi. Është ky bilanci në tetë vite i ligjit për investimet strategjike, përfshirë ato të huaja të miratuar në 2015-n me fabul “ne ta japim falas, ti ndërto diçka”.
“Të paktën investitorët britanikë nuk kana rritur të gjejnë mjedisin e përshtatshëm dhe kornizën ligjore të nevojshme për të investuar në Shqipëri me anë të këtij ligji që do të thosha se është i paplotë”, tha për A2 CNN, Zenel Hoxha nga Dhoma Britanike e Tregtisë.
Pjesa më e madhe e projekteve të propozuara dhe të miratuara, rreth 85 për qind rezultojnë në fushën e turizmit. Të dhënat tregojnë se lista e statuseve të dhëna si “investitorë strategjik” pasohet nga bujqësia, energjia, industria dhe zonat e zhvillimit.
“Zgjatja e afateve për të pestën herë nuk është zgjidhje. Ligji ka nevojë për ndryshime rrënjësore dhe jo arna”, shtoi Hoxha.
I miratuar në vitin 2015, ligji “Për Investimet Strategjike” u prezantua si një masë e përkohshme nga qeveria, fillimisht me afat deri në vitin 2018.
Por afati i tij u shty edhe dy herë të tjera në Kuvend. Të gjithë investitorët strategjikë trajtohen në mënyrë të diferencuar nga bizneset e tjera, pasi përfitojnë lehtësi në taksa, procedura administrative të shpejta apo programe mbështetëse.
