12 hetues pranë Byrosë Kombëtare të Hetimit, me urdhër të SPAK-ut, janë trajnuar dhe kanë marrë në dorë bërthamën e përgjimeve, një formë e rëndësishme për kërkimin e provës për aktivitetin e krimit dhe korrupsionit. Në raportin e veprimtarisë së SPAK-ut për vitin 2022, thuhet se 12 hetuesit, për shkak të volumit të punës, kanë punuar me orë të zgjatura, edhe gjatë fundjavave si dhe për ditë festash. Gjatë vitit 2022, janë përgjuar 2177 telefona të personave të dyshuar si të përfshirë në aktivitet kriminal. Telefonatat janë përgjuar për llogari të 122 procedimeve penale. Në raport thuhet se rastet e dekonspirtimit kanë qenë zero.
“Në periudhën që analizojmë nuk ka ndodhur asnjë rast dekonspirimi i të dhënave të përfituara nga interceptimi. Oficerët e policisë gjyqësore/Hetuesit e BKH-së të Strukturës së Përgjimit të Komunikimeve Elektronike, krahas detyrimit për kalimin e informacionit në kohë dhe në dinamikë dhe përgatitjen në kohë të transkripteve të shkruara të materialit të përgjuar, garantojnë dërgimin e menjëhershëm të tyre prokurorit që ka kërkuar përgjimin. Numri i personave, të cilët mund të njihen me materialin e përgjuar është i kufizuar. Materiali i përgjuar nuk i vihet në dispozicion asnjë personi, i cili nuk ka kërkesë zyrtare ose nuk është i autorizuar për të marrë këtë informacion”, thuhet në raport.
Nga përgjimet është bërë e mundur me pas ndalimi i rreth 160 personave të dyshuar për kryerje të veprave penale. Shumica e telefonave janë përgjuar për llogari të dosjeve penale për grupet kriminale dhe të trafikut të drogës. Në vend të dytë vijnë përgjimet për korrupsionin e zyrtarëve publikë. Krahas sektorit të përgjimeve, pranë SPAK vepron edhe një sektori i ekspertizës, i cili gjatë vitit 2022 ka zbërthyer 313 aparate celularë.
“Nga 240 vendime janë pranuar 328 aparate celularë, 59 kompjuter dhe laptop, 11 videoregjistrues DVR, 17 USB, 3 borde të intergruara (qark elektronike), 3 TV, 4 GPS (lokalizues vendodhjeje), 4 Dronë, 46 CD/DVD, 11 tableta si dhe 14 pajisje të tjera që përfshijnë karta SIM, adpatorë, magnetofon. Në sektorin e ekspertizës, nga 3 ekspertë, për periudhën në fjalë janë kryer 256 Akte Ekspertimi dhe është bërë e mundur ekzaminimi i 313 aparateve celularë, 40 kompjuter dhe laptop, 7 DVR, 23 USB, 1 GPS (lokalizues vendndodhjeje), 1 Dron, 25 CD, 3 tabletë si dhe 10 pajisje të tjera që përfshijnë karta SIM, adaptorë, magnetofon”, thuhet në raport./shqiptarja.com/m.j
