Nga Ornela Çuçi
Meqë politika shqiptare ka hyrë zyrtarisht në fazën e paraburgimit, arrest-shtëpisë, detyrim-paraqitjes dhe monitorimit 24/7, ndoshta është koha ta bëjmë më në fund transparente, andaj propozoj:
SUPER BIG BROTHER, një reality show politik, pa skenar. Skenarin e kanë konsumuar pjesëmarrësit prej vitesh.
Koncepti:
Një shtëpi e vetme.
Kamera 24 orë.
Banorë që, për herë të parë, nuk flasin për popullin,
por jetojnë si populli, me rregulla, me orare, pa shofer, pa imunitet, pa “një telefon që ta marrin gjithë dynjanë në qafë”.
Zë do të ketë boll. Sepse aty ku pushteti rrëshqet,
fjalët shtohen. Justifikimet gjithashtu.
Pse do të ishte më i suksesshëm se çdo fenomen televiziv? Përfshirë këtu Luisin.
Sepse këta janë personazhe që publiku i njeh prej 30 vitesh, jo të panjohur VIP që hyjnë për famë apo se janë pabuksa thjesht.
Sepse nuk janë aktorë, janë produkte reale të pushtetit, dhe e luajnë veten pa nevojë për regji. E aktorë më të mirë nuk ke ku gjen.
Sepse publiku nuk ka më nevojë për dramë dashurie,
por për dramë drejtësie. Gati është të shqyeje në çdo kohë.
Dhe sepse ky format nuk ka nominime nga banorët,
por nga realiteti ligjor, me sa duket I vetmi deri tani që nuk negocion.
Dhe sepse ata kanë ende shumë për të dhëne.
Rubrikat kryesore
• Dhoma e Rrëfimit → ku flitet pafund, por nuk pranohet asgjë
• Sfida e Javës → të jetosh pa u justifikuar
• Prime Time → justifikime live
• Eliminimi → jo me SMS, por me dosje
Një Big Brother pa fitues. Fituesit i kemi parë tashmë.
Mesazhi publik: Ky nuk është show argëtimi. Është edukim qytetar.
Suksesi i garantuar
Shqiptarët e kanë ndjekur politikën si serial tragjik për dekada. Me role të njëjta, dialogë të njëjtë, dhe fund që nuk vinte kurrë.
Tani është koha ta shohin pa montazh.
Sepse kur drejtimi i një vendi shndërrohet pa asnjë turp në format televiziv, problemi nuk është më as paraburgimi, as kamerat. Problemi është se kjo na duket krejt normale.
Dhe ky është ndoshta dënimi më i madh, jo për ata brenda shtëpisë, por për ne jashtë saj, që jemi mësuar ta quajmë këtë realitet.
