Banka e Shqipërisë bën të ditur se në muajin maj, interesi mesatar i kredisë në euro zbriti në nivelin 4.7%.
Rënia mujore ka ardhur nga kredia për sektorët jofinanciarë në valutë, që është reduktuar me 3.9 miliardë lekë, duke dhënë ndikimin e vetëm në trendin rënës të huasë. Ndërkohë kredia në lekë për këtë sektor është rritur me 1.3 miliardë lekë.
Në tërësi, sipas BSH-së, si bizneset private ashtu edhe individët kanë përfituar nga rënia e interesave për kreditë në euro.
Tek bizneset, rënia e interesave vërehet tek kreditë për likuiditet, ndërsa interesi për kreditë për investime vijon të qëndrojë në nivele minimale. Individët kanë përfituar norma më të ulëta për kreditë hipotekare, në një kohë që normat e interesit për kreditë konsumatore janë rritur./a.m.
