Miqësia mes Presidentit të SHBA-ve, Barack Obama dhe Zv.Presidentit Joe Biden, është mjaft e fortë. Ata drekojnë së bashku çdo javë. Shpesh herë edhe veshin kravatat të ngjashme.
Familjet e tyre shkojnë bashkë në pushime. Obama gjithashtu ka mbajtur fjalimin mortor në varrimin e djalit të Joe Biden, i cili vdiq nga kanceri vitin e kaluar.
Biden tregoi se sa e thellë është miqësia e tyre. Ai nënvizoi në rrëfimin e tij se si Obama i ofroi atij para gjatë sëmundjes së djalit të tij, Beau.
Më pas, Biden tregoi se i tha Presidentit, se duhet ta shesë shtëpinë e tij, sepse i duheshin paratë për shërimin e djalit. Por ai tha se, Obama nuk e përkrahu për këtë.
“Ai u ngrit në këmbë dhe më tha: Nuk do ta shesësh atë shtëpi. Më premto se nuk do ta shesësh shtëpinë”. “Unë do të t’i jap paratë e nevojshme, çfarë do që të duhet, por më premto se nuk do ta shesësh shtëpinë… Mos e bëj Joe… Më premto se nuk do ta bësh”, ka rrëfyer Joe Biden në një intervistë për CNN. / r.a
