Prokuroria ka publikuar dje argumentet që paraqiti në Gjykatën e Apelit, për të dënuar Arben Frrokun për vrasjen e komisarit Dritan Lamaj.
Në dosje tregohet edhe se si Arben Frroku, mësonte të dashurën e tij, se çfarë t’u thoshte policëve pas ngjarjes, raporton TEMA.
“Nëse ka nji gjyq kushëriri im, nesër ishalla i prehet bo, për tjerat s’o t’u plas k…, ato derrat vazhdojnë punën e vet”, i thotë Frroku vajzës me të cilën bashkëjetonte.
Në dosjen e prokurorisë, shihet se edhe vëllai i Arben Frrokut, Marku, ka ndryshuar dëshminë e tij.
Frroku ka bërë të tjera deklarata para prokurorëve, dhe të tjera gjatë gjykimit.
“Kam marrë në telefon Arbenin dhe kam biseduar për punë pune dhe nuk e kam pyetur ku ishte.
Veç këtij komunikimi, nuk kam pasur komunikim tjetër.
Vetëm kur ka ardhur policia në shtëpi rreth orës 20:30, e kam marrë në telefon Arbenin dhe e kam pyetur se ku ishte.
Ai më tha se ishte në Korçë me Jak Jakun dhe do shkonte në Selanik për t’u takuar me djalin e xhaxhait, i cili kishte marrë disa ditë leje për të dalë nga burgu”, ka thënë Mark Frroku para prokurorëve.
Ndërsa në gjykatë, ai ka thënë se jo vetëm ai, por gjithë familja e dinte që Arben Frroku do të shkonte në Greqi, për çështjen e gjykimit të kushëririt të tyre.
