Biblioteka Kombëtare e Singaporit ka vendosur që të përdorë rreth 500 m2 gjelbërim të qytetit për të ndërtuar një vepër që do t’i shërbejë së ardhmes. Kjo fushë e gjelbërt do të kthehet shumë shpejt në një ambient leximesh shumë komod për fëmijët. Të vegjlit do të mund të gjejnë atje më shumë se 70.000 libra për natyrën dhe mbrojtjen e planetit. Dhe gjithçka, në një ambient të mrekullueshëm natyror.
Në projektin e kësaj biblioteke të blertë është vendosur që në qendër të kësaj hapësire leximesh të jetë një “shtëpi në pyll”. Pikërisht kjo “shtëpi” është parë si një alternativë e mirë që lexuesit e vegjël të largohen nga xhungla e qytetit jo vetëm nëpërmjet imagjinatës, por edhe konkretisht.
“Shtëpia e madhe e pyllit” do të realizohet me dru të ricikluar, tuba, shishe plastike dhe kanoçe të përdorura. Fëmijët që do të mund të bëhen pjesë e kësaj biblioteke të blertë do të jenë kryesisht nga mosha 4 deri në 12 vjeç.
