Biblioteka Kombëtare e Shqipërisë sot me një ceremoni po kremton 95-vjetorin e themelimit të saj, ku i pranishëm është kryeministri i Shqipërisë, Edi Rama, Ministrja e Kulturës, Mirela Kumbaro, përfaqësues të trupit diplomatik të akredituar në Tiranë, botues, studiues, lexues dhe dashamirës të artit dhe kulturës.
Ministrja e Kulturës Mirela Kumbaro në fjalën e saj vlerësoi rolin e këtij institucioni, ekzistenca e të cilit tha ajo është më e hershme se e shumë institucioneve të tjera shtetërore e publike. Sfida jonë tha ajo, është përmirësimi i rrjetit të bibliotekave qytetase ku roli i bibliotekës kombëtare është kyç.
Ndërsa drejtoresha e Bibliotekës Kombëtare, Persida Asllani tha se sot Biblioteka vjen me një fond prej 1.2 milionë librash, me një qarkullim rreth 200 mijë njësi në vit me 6 mijë anëtare, ku 57 % janë të rinj
Sipas saj biblioteka kombëtare vazhdon të pasurohet.
Në këtë vit kremtues Biblioteka Kombëtare do të shpallë edhe fituesit e Çmimit të Bibliofilisë “Lumo Skëndo” 2013 dhe 2014. Çmimi Kombëtar i Bibliofilisë “Lumo Skëndo”, i akorduar për herë të parë në vitin 2006, është çmimi i vetëm që nxit dhe mbështet cilësinë estetike të botimeve shqiptare.
”Ky çmim i shërben vlerësimit dhe stimulimit të botimeve me vlera të spikatura bibliofilike dhe intelektuale, nëpërmjet evokimit të personalitetit të kulturës dhe politikës shqiptare, Lumo Skëndo (Mit’hat Frashëri), veçanërisht si themelues i bibliofilisë shqiptare.
Kremtimi i 95-vjetorit të themelimit shoqërohet edhe me çeljen e ekspozitës “Biblioteka e Bibliotekave”. Ajo është konceptuar si një nderim për ato biblioteka private ose kolektive, përmes të cilave është ngjizur pjesa më e vlefshme e fondit të albanologjisë, d uke i lejuar në disa raste këtij institucioni të flasë sot për eksluzivitete dhe raritete”, thuhet në njoftim.
Ndër bibliotekat më të spikatura të kësaj ekspozite vlen të përmendet Biblioteka e Lumo Skendos, Biblioteka e Weigand-it, Biblioteka e Françeskanëve, Biblioteka e Bushatllinjve, Biblioteka Carnavon, Biblioteka Herbert, Biblioteka e Mitrush Kutelit, Biblioteka e Nexhip Alpan, Biblioteka e Aleks Budës etj.
ATSH
