Këshilli Bashkiak i Vlorës u konstituua sot si dhe u betua kryetari i bashkisë Vlore, Dritan Leli për një mandat të dytë.
Në mbledhjen e sotme të Këshillit Bashkiak Vlorë, merrnin pjesë kryetari i Kuvendit, Gramoz Ruçi i cili është njëkohësisht koordinator politik për qarkun Vlorë dhe deputeti i PS, Damian Gjiknuri.
Kryetare e këshillit bashkiak të Vlorës u zgjodh Migena Balla e cila u votua me 45 vota pro, 3 kundra. Ndërsa nënkryetare të Këshillit bashkiak u zgjodhën një përfaqësuese e Bindjes Demokratike dhe një tjetër në radhët e Partisë Social Demokrate.
Leli tha gjatë fjalës së tij se ky 4-vjeçar do jetë plot suksese dhe projekte të reja.
“Ky është një mandat me më shumë përgjegjësi për t’ju përgjigjur nevojave të qytetarëve në çdo skaj të territorit. Me detyrimin për më shumë punë në sektorin e turizmit e përgjegjësinë ndaj komunitetit të biznesit të qytetit, që janë fytyra e Vlorës sonë turistike”, tha ai.
/a.r
